मुंबई : महाराष्ट्राचा मान समजली जाणारी पैठणी घ्यायचे प्रत्येक मराठी स्त्रीचे स्वप्न असते. अनेक कार्यक्रम, सणवार आणि फॅशन शोज मधून झळकलेली पैठणी आता मोठ्या पडद्यावर अवतरणार आहे, 'गोष्ट एका पैठणीची' या मराठी चित्रपटातून. या 'पैठणी' ला यावर्षीचा राष्ट्रीय पुरस्कार देखील मिळाला आहे. ६८ व्या राष्ट्रीय चित्रपट पुरस्कार २०२२ चा सर्वोत्कृष्ट चित्रपटाचा मानकरी (National Award winner Goshta Eka Paithnichi has been released) ठरलेला 'गोष्ट एका पैठणीची'चे नवीन पोस्टर प्रेक्षकांच्या भेटीस आलं आहे.
पोस्टरमध्ये सायली संजीव, सुव्रत जोशी आणि आरव शेट्ये दिसत असून; त्यांचं हसतंखेळतं कुटुंब दिसत आहे. छोट्या गावातील या गृहिणीचा स्वप्न पूर्ण करण्याचा प्रवास तिला कुठंवर घेऊन जातो, हे चित्रपट पाहिल्यावरच कळेल. एका सर्वसामान्य कुटुंबातील गृहिणीच्या सामान्य स्वप्नाचा प्रवास असणाऱ्या या चित्रपटात सायली संजीव, सुव्रत जोशी, मृणाल कुलकर्णी, मिलिंद गुणाजी, शशांक केतकर यांच्या प्रमुख भूमिका आहेत.
प्लॅनेट मराठीचे प्रमुख, संस्थापक अक्षय बर्दापूरकर म्हणतात, नुकतीच 'गोष्ट एका पैठणीची'ने राष्ट्रीय पुरस्कारावर आपली मोहोर उमटवली आहे. चित्रपटाबद्दल सकारात्मक प्रतिक्रिया येत असतानाच आम्ही काही दिवसांपूर्वी या चित्रपटाचा प्रीमिअर सिंगापूरमध्ये प्रकाशित केला आणि मुख्य म्हणजे आम्हाला तिथे प्रेक्षकांचा भरभरून प्रतिसाद मिळाला.
चित्रपटाचे दिग्दर्शक शंतनू रोडे म्हणतात, 'प्रत्येक जण उराशी एक स्वप्न बाळगून असतो आणि त्याची पूर्तता करण्यासाठी सर्वोतोपरी धडपड सुरु असते. यात कधी यश येते, कधी अपयश येते. आयुष्यात एखादी पैठणी घ्यावी, इतकं सामान्य स्वप्न पाहणाऱ्या गृहिणीचा असामान्य प्रवास यात पाहायला मिळणार आहे. हा कौटुंबिक सिनेमा नकळत बऱ्याच गोष्टी शिकवणारा आहे.'
या सिनेमाचे लेखन, संवाद आणि दिग्दर्शन शंतनू रोडे यांचे असून; चित्रपटाची निर्मिती अक्षय विलास बर्दापूरकर, अभयानंद सिंग, पियुष सिंग, सौरभ गुप्ता यांनी केली आहे. तर अश्विनी चौधरी, चिंतामणी दगडे, सौम्या मोहंती विळेकर, गायत्री दिलीप चित्रे हे चित्रपटाचे सहनिर्माते आहेत. मंत्रा व्हिजन प्रस्तुत या चित्रपटाचे निर्माता अक्षय विलास बर्दापूरकर, पियुष सिंग, गोल्डन रेशो फिल्म्स आणि प्लॅनेट मराठी, लेकसाइड प्रॉडक्शनचे आहेत.
नुकताच या चित्रपटाचा भव्य प्रीमिअर सिंगापूर येथे झाला. आता लवकरच म्हणजे २ डिसेंबर रोजी स्वप्नांचा नक्षीदार प्रवास म्हणजेच 'गोष्ट एका पैठणीची' हा चित्रपट संपूर्ण महाराष्ट्रात प्रदर्शित होणार आहे.
