मुंबई - जगभरात थैमान घातलेल्या कोरोना विषाणूचे मुंबईमध्ये रुग्ण मोठ्या प्रमाणात वाढत आहेत. मुंबई परिसरात गेल्या २४ तासात १५ नवे रुग्ण आढळून आले आहेत. यात मुंबईमधील ९ तर मुंबई बाहेरील ६ रुग्णांचा समावेश आहे. मुंबई परिसरात १५ नवे रुग्ण आढळून आल्याने रुग्णांची एकूण संख्या ७७ झाली आहे. यामधील ४ रुग्णांचा मृत्यू झाला आहे. आतापर्यंत एकूण १० रुग्णांना डिस्चार्ज देण्यात आला आहे, अशी माहिती पालिकेच्या आरोग्य विभागाने दिली आहे.
मुंबई परिसरात गेल्या २४ तासात आढळून आलेल्या १५ रुग्णांपैकी ७ रुग्ण हे मुंबईमधील एका रुग्णाच्या सहवासातील आहेत. २ जणांनी यूएईचा प्रवास केला आहे. ठाण्यातील दोन रुग्णांनी युकेचा प्रवास केला आहे. डोंबिवली येथील रुग्णाने तुर्कीचा प्रवास केला आहे. वाशी येथील रुग्णाने युकेचा तर पुणे येथील रुग्णाने यूएईचा प्रवास केला आहे. कस्तुरबा रुग्णालयात उपचारासाठी दाखल केलेले १२ रुग्ण बरे झाले आहेत. त्यांच्या लागोपाठ दोन टेस्ट निगेटिव्ह आल्या आहेत. यामधील ८ रुग्णांना दोन दिवसांपूर्वी डिस्चार्ज देण्यात आला होता. आज आणखी दोन जणांना डिस्चार्ज देण्यात आला आहे. यामुळे डिस्चार्ज देण्यात आलेल्या रुग्णांची संख्या एकूण १० झाली आहे.
२२३ संशयित रुग्ण भरती -
कोरोनाचे आज दिवसभरात ४२९ संशयित रुग्ण विविध रूग्णालयात, बाह्य रुग्ण विभागात तपासण्यात आले. त्यातील १२४ संशयित रुग्ण विविध रुग्णालयात भरती करण्यात आले. आजच्या दिवसात २२३ संशयित रुग्णांना विविध रुग्णालयात भरती करण्यात आले आहे. आजच्या दिवसात मुंबईमध्ये ९ तर मुंबईबाहेरील ६ असे एकूण १५ रुग्ण पॉझिटिव्ह आढळले आहेत. या रुग्णांवर पालिकेच्या कस्तुरबा रुग्णालयात उपचार सुरू आहेत. मुंबईमध्ये आलेल्या २९७ प्रवाशांना सेव्हन हिल हॉस्पिटल व पंच तारांकित हॉटेलमध्ये होम क्वारेंटाईन करून ठेवण्यात आले आहे.
आता पर्यंत ६९३८ संशयित रुग्णांना तपासले -
जानेवारीपासून आतापर्यंत ६९३८ संशयित रुग्णांना तपासण्यात आले आहे. आतापर्यंत १५३१ संशयित रुग्णांना भरती करण्यात आले. त्यापैकी मुंबईमधील ५२ तर मुंबईबाहेरील २५ रुग्ण असे एकूण ७७ रुग्णांची पॉझिटिव्ह म्हणून नोंद झाली आहे. त्यापैकी ४ रुग्णांचा मृत्यू झाला आहे. त्यात मुंबईमधील २ आणि मुंबईबाहेरील २ रुग्णांचा समावेश आहे.
