मुंबई- जगभरात थैमान घातलेल्या कोरोना विषाणूचे शहरात मोठ्या प्रमाणात रुग्ण आढळून येत आहेत. या रुग्णांना बरे करताना आरोग्य आणि पालिकेतील कर्मचाऱ्यांना आपला जीव गमवावा लागत आहे. या कर्मचाऱ्यांच्या कुटुंबियांना न्याय मिळावा म्हणून त्यांच्या वारसांना पालिकेत अनुकंपा तत्वावर नोकरी देण्याचा निर्णय मुंबई महापालिका प्रशासनाने घेतला आहे.
शहरात कोरोनाचे सुमारे १० हजार रुग्ण आहेत. ३८७ रुग्णांचा मृत्यू झाला आहे. या रुग्णांवर उपचार करण्याचे काम पालिकेच्या आणि खासगी आरोग्य कर्मचाऱ्यांकडून केले जात आहे. शहरात रोगराई पसरू नये, मुंबईकरांना वेळेवर पाणी मिळावे, हातावर पोट असलेल्या नागरिकांना अन्न मिळावे म्हणून पालिका कर्मचारी काम करत आहेत. मात्र, या कर्मचाऱ्यांनाही कोरोनाची लागण झाली आहे. आतापर्यंत ४ पालिका कर्मचाऱ्यांचा मृत्यू झाला आहे. अन्न वाटप करणाऱ्या कर्मचाऱ्याला कोरोनामुळे आपला जीव गमवावा लागला आहे.
कोरोना विषाणू विरोधातील लढाईत पालिका, आरोग्य कर्मचारी उतरले असताना त्यांचा जीव जात असल्याची गंभीर दखल महापालिका प्रशासनाने घेतली आहे. कोरोनामुळे मृत्यू झालेल्या कर्मचाऱ्यांच्या एका वारसाला पालिकेची अनुकंपा तत्वावर नोकरी दिली जाणार आहे. मृत कर्मचाऱ्यांच्या वारसाच्या शैक्षणिक अर्हतेनुसार कामगार, कक्ष परिचर, हमाल, आया, कार्यालयीन शिपाई, लिपिक, कनिष्ठ लेखा परीक्षक, लेखा सहाय्यक या रिक्त पदानुसार सामावून घेतले जाणार आहे.
हेही वाचा- MAHA CORONA LIVE : राज्यात नवीन 841 कोरोनाबाधितांची भर, एकूण रुग्णांचा आकडा १५ हजार ५२५ वर
