Sanjay Raut News: फेविकॉलचा जोड वगैरे काही नाही, सरकार दोन महिन्यात पडणार- संजय राऊत

शिवसेना उबाठा गटाचे प्रवक्ते खासदार संजय राऊत यांनी पुन्हा एकदा शिंदे फडणवीस सरकारवर निशाणा साधला आहे. विशेष म्हणजे त्यांना धमकी दिल्या प्रकरणी अटक करण्यात आलेल्या मयूर शिंदे याविषयी बोलताना त्यांनी हा बनाव रचला असल्याचे सांगितले आहे. त्याचबरोबर पालघरच्या गुरूवारच्या कार्यक्रमांमध्ये मुख्यमंत्री एकनाथ शिंदे यांनी युतीबाबत बोलताना हा फेविकॉलॉचा मजबूत जोड आहे, असे वक्तव्य केले होते. यावरून सुद्धा संजय राऊत यांनी त्यांच्यावर टीका केली आहे.

मुंबई : संजय राऊत व त्यांचे बंधू आमदार सुनील राऊत यांना येणाऱ्या धमकी प्रकरणी मयूर शिंदे या इसमाला अटक करण्यात आली आहे. मयूर शिंदे हा राऊत कुटुंबाच्या जवळचा असल्याचे सांगितले जात आहे. संजय राऊत यांनी हा बनाव असल्याचे सांगितले जात आहे. यावर बोलताना संजय राऊत म्हणाले की, बनाव मूर्ख लोक रचतात. गेल्या वर्षभरात सातत्याने अशा घटना घडल्या आहेत. मागे पुण्यातून व्यक्ती पकडले ते रावसाहेब दानवे यांच्या गावातील होते, म्हणून दानवे साहेबांनी बनाव रचला का? असेही राऊत म्हणाले.

बनाव केला असेल : मयूर शिंदे याने मंत्री रवींद्र चव्हाण यांच्या उपस्थितीत भाजपमध्ये प्रवेश केला, तो मिंधे गटामध्ये आहे. बनाव रचायचा असता तर मी फोन करून पोलिसांना कशाला सांगितले असते? आता फोन नंबरवरून लोकं ट्रेस होतात. हा त्यांचा बनाव असेल. उलट ठाणे शहर व त्याच्या आसपासच्या भागात लोक ही पोलिसांच्या मदतीने भाजपमध्ये किंवा मिंधे गटात गेलेले आहेत. त्यांची लोक माझ्यासाठी का काम करतील? या भानगडीत आम्हाला पडायचे नाही आहे. गुरूवारी रात्री सुद्धा एका व्यक्तीला पकडले आहे. तो दुसऱ्याच गटाचा माणूस आहे. मी कशाला त्यामध्ये बोलू? माझ्याकडे जे नंबर आले होते ते मी पोलिसांना पाठवले. पोलिसांनी त्याचा तपास करावा. पोलिसांनी खरे की खोटे पकडले आहेत, हे सुद्धा मला माहित नाही. बनावट सुद्धा पकडले असतील, बनाव तयार केला असेल. या सरकारचा भरोसा काय आहे? हे सरकार कुठल्याही स्तराला जाऊ शकते. खोटे गुन्हे लावून जर माणसांना तुरुंगात टाकले जात आहे. केंद्रीय तपास यंत्रणांच्या माध्यमातून ते हवे ते करत आहे.

बेडकाने हत्तीशी तुलना करू नये : संजय राऊत पुढे म्हणाले की, भारतात जे जाहिरात कांड चालू आहे. त्यावरून लक्ष विचलित करण्यासाठी हा बनाव रचला असल्याची माहिती आहे. मी पोलिसांकडे कधीही सुरक्षा मागितली नाही. मी आमच्या सरकार असतानाही सुरक्षा व्यवस्था कधी मागितली नाही. एकनाथ शिंदे म्हणतात की, यह फेविकॉल का मजबूत जोड है टूटेगा नही. फेविकॉलचा मजबूत जोड असेल तर देवेंद्र फडणवीस यांचे जे प्रवक्ते आहेत, खासदार अनिल बोंडे त्यांनी यांना बेडकाची उपमा दिली आहे. बेडकाने हत्तीशी तुलना करू नये. मग हा फेविकॉलचा जोड आहे, असं समजायचं का? काल पालघरला व्यासपीठावर मुख्यमंत्री व उपमुख्यमंत्री यांच्यातला संवाद पाहिला असेल तर ते एकमेकांकडे पहायला तयार नाहीत. हा फेविकॉल का जोड वगैरे काही नाही. पुढच्या दोन महिन्यांमध्ये सुप्रीम कोर्टाने दिलेल्या निर्णयाची अंमलबजावणी करावी लागणार आहे आणि हे सरकार राज्यातून गेल्याशिवाय राहणार नाही.

१०० लोकांसाठी १ हजार पोलीस : बुधवारी मुंबईत ट्रेनमध्ये विद्यार्थिनीवर झालेल्या लैंगिक अत्याचारावर बोलताना संजय राऊत म्हणाले की, विरोधी पक्ष नेते अजित पवार यांनी महिलांच्या सुरक्षेबाबत जो मुद्दा उपस्थित केला आहे त्याच्याशी मी सहमत आहे. सरकारला कायद्यानुसार गंभीर विषयाकडे लक्ष द्यायला वेळ नाही. परीक्षेला निघालेल्या एका विद्यार्थिनी मुलीवर ट्रेनमध्ये जर अशा प्रकारचे लैंगिक अत्याचार होत असतील. तर राज्याचे गृहमंत्री ज्यांच्याकडे सर्व रक्षणाची जबाबदारी आहे ते काय करत आहेत? कुठे आहेत पोलीस? की पोलीस फक्त ४०; बेईमान गद्दार आमदारांच्या संरक्षणासाठी ठेवले आहेत. ठाण्यामध्ये मिंदे गटात प्रवेश केलेल्या १०० लोकांच्या आरक्षणासाठी १ हजार पोलीस तैनात आहेत. फक्त ठाण्यामध्ये मुख्यमंत्री व त्यांच्या नातेवाईकांसाठी, गुंडांसाठी किती पोलीस बंदोबस्त आहेत. पोलीस बंदोबस्त जनतेसाठी, महिलांच्या रक्षणासाठी ठेवा, असेही राऊत म्हणाले.

चार मंत्र्यांना मंत्रिमंडळातून वगळावे : कृषी क्षेत्रात कोट्यावधी रुपयांचा भ्रष्टाचार सुरू आहे. बोगस डाळ, खते याच्यामध्ये कोट्यावधी रुपयांचा भ्रष्टाचार सुरू आहे. खरे म्हणजे राज्याचे मुख्यमंत्री, उपमुख्यमंत्र्यांनी या संदर्भात तात्काळ पावलं उचलायला पाहिजेत. मुख्यमंत्री काही करू शकत नाहीत कारण मुख्यमंत्री हे मंत्र्यांचे, आमदारांचे मिंदे आहेत. पण चार मंत्र्यांना मंत्रिमंडळातून वगळावे यामध्ये अब्दुल सत्तारांचे नाव आहे. चार किंवा पाच मंत्र्यांमुळे महाराष्ट्राची, भाजपची प्रतिमा मलीन होत चालली आहे. हे सर्व सहन केले जाणार नाही. अशा स्पष्ट सूचना शिंदे यांच्या दिल्लीतील हाय कमांडने दिल्या आहेत, असेही राऊत म्हणाले. तसे तेलंगणाचे मुख्यमंत्री केसी राव तेलंगणामधून महाराष्ट्रात घुसत आहेत, कारण तेलंगणामध्ये त्यांच्या पायाखालची वाळू सरकत आहे. समान नागरी कायदा याबाबत हालचाली सुरू झाल्या आहेत कारण निवडणुका जवळ आल्या आहेत, असा टोलाही संजय राऊत यांनी लगावला आहे.

हेही वाचा :