मुंबई - विधानसभा निवडणुकीत भाजप-सेना युती होणार का? याची चर्चा सर्वत्र होती. अखेर ही युती झाली. पण....त्याला अपवाद ठरलाय तो सिंधुदुर्ग जिल्हा. या जिल्ह्यात विधानसभेच्या तीन जागा आहेत. या तीनही जागांवर शिवसेना विरोधात भाजपचे उमेदवार उभे ठाकले आहेत. त्यामुळे राज्यात जरी युती असली तरी सिंधुदुर्गात मात्र युती तुटली आहे.
हेही वाचा - 'मॉब लिंचींग' आपली संस्कृती नाही; हा शब्द पाश्चिमात्यांच्या धर्म ग्रंथात - मोहन भागवत
सिंधुदुर्ग जिल्ह्यात राणे आणि शिवसेनेते वैर काही संपण्याचे नाव घेत नाही. नारायण राणे यांचे चिरंजीव नितेश राणे यांनी भाजपमध्ये प्रवेश केला. त्यांना देवगड-कणकवली मतदारसंघातून भाजपची उमेदवारीही मिळाली. त्यामुळे युती धर्म म्हणून शिवसेनेला राणेंचे काम करणे भाग होते. पण तसे न होता शिवसेनेने चक्क एबी फॉर्म देत सतिश सावंत यांना नितेश राणे यांच्या विरोधात उभे केले. त्यामुळे या मतदारसंघात शिवसेना विरुद्ध भाजप अशी थेट लढत पहायला मिळणार आहे. सावंत हे राणेंचे जुन्ने कट्टर कार्यकर्ते म्हणून ओळखले जातात.
हेही वाचा - ओबीसी राजकारणाचा नवा केंद्रबिंदू... काय आहे भगवान भक्ती गड?
देवगड-कणकवली मतदारसंघात शिवसेनेने भाजपच्या अधिकृत उमेदवाराविरोधात उमेदवार दिल्याने भाजपनेही तसेच पाऊल उचलले. कुडाळ मालवण मतदारसंघामध्ये शिवेसेनेचे वैभव नाईक मैदानात आहेत. त्यांचा प्रचार न करण्याचा निर्णय जिल्ह्यातील भाजप कार्यकर्त्यांनी घेतला आहे. शिवाय स्वाभिमानीच्या उमेदवाराला अधिकृत पाठिंबा जाहीर ही केला आहे.
अशीच काही स्थिती सावंतवाडी मतदारसंघात आहे. या मतदारसंघातून भाजपचे प्रदेश सचिव राजन तेली यांनी शिवसेना उमेदवार आणि गृहराज्यमंत्री दीपक केसरकर यांच्या विरोधात उमेदवारी अर्ज दाखल केला आहे. त्यांना भाजपने जरी एबी फॉर्म दिला नसला तरी त्यांनी मैदानातून माघार घेतली नाही. सावंतवाडीतही भाजपचे कार्यकर्ते तेली यांचाच प्रचार करतील, अशी स्थिती आहे. त्यामुळे जिल्ह्यातील तीनही मतदारसंघात शिवसेना विरूद्ध भाजप असाच सामना रंगणार आहे. त्यात बाजी कोण मारणार याकडे संपूर्ण राज्याचे लक्ष लागले आहे.
