मुंबई - बीकेसीतील एमएमआरडीए मैदानावरील पहिले नॉन क्रिटिकल कोव्हिड रुग्णालय सोमवारपासून सुरू होईल, अशी माहिती आरोग्य मंत्री राजेश टोपे यांनी दिली आहे. राष्ट्रवादी काँग्रेसचे अध्यक्ष शरद पवार आणि टोपे यांनी काल (शुक्रवार) संध्याकाळी या रुग्णालयाच्या कामाची पाहणी केली. त्यावेळी टोपे यांनी सोमवारपासून या रुग्णालयात रुग्णांवर उपचार सुरू होतील असे सांगितले.
हॉस्पिटलचे 95 टक्क्यांहून अधिक काम पूर्ण झाले असून रविवारपर्यत काम 100 टक्के पूर्ण करत सोमवारपासून रुग्णसेवा सुरू होणार आहे. त्यामुळे हा मोठा दिलासा मानला जात आहे. दरम्यान येथे नॉन क्रिटिकल रुग्णांवर येथे उपचार करण्यात येणार आहेत. तर दुसरीकडे येथे आणखी 1000 बेड वाढवण्याचाही निर्णय घेतला आहे. शिवाय, येथे गंभीर स्थितीतील रुग्णांसाठी 450 आयसीयू बेडही तयार करण्यात येण्याची शक्यता आहे.
