Bandra Versova Sea Link Profile : 'वांद्रे टू वर्सोवा' अवघ्या अर्ध्या तासात! जाणून घ्या सागरी सेतूबद्दल सर्वकाही

मुंबईतील वांद्रे वर्सोवा सागरी सेतूला आता 'स्वातंत्र्यवीर सावरकर सेतू' असे नाव दिले जाणार आहे. मुख्यमंत्री एकनाथ शिंदे यांनी नुकतीच ही घोषणा केली. 17 किलोमीटर लांबीचा हा प्रकल्प 2026 पर्यंत पूर्ण होण्याची शक्यता आहे. या प्रकल्पाच्या पूर्णत्वानंतर वांद्रे वर्सोवा हे अंतर अवघ्या अर्ध्या तासात पार केले जाणार आहे. जाणून घेऊया नेमका काय आहे हा प्रकल्प.

मुंबई : मुंबईतील वाहतूक कोंडीच्या समस्येवर उपाय म्हणून अरबी समुद्रात वांद्रे वर्सोवा सागरी सेतू उभारला जात आहे. या 17 किलोमीटर लांब सागरी सेतूच्या उभारणीचे काम 2018 पासून हाती घेण्यात आले आहे. मात्र सध्या या प्रकल्पाचे काम संथ गतीने सुरू असून आत्तापर्यंत केवळ 7 टक्केच काम पूर्ण झाले आहे. सध्या वांद्रे ते वर्सोवा हे पार करण्यासाठी दीड तासांचा अवधी लागतो, मात्र या प्रकल्पाच्या पूर्णत्वानंतर हे अंतर केवळ अर्ध्या तासात पूर्ण होणार आहे.

असा असेल वांद्रे-वर्सोवा सागरी सेतू

कसा असेल वांद्रे वर्सोवा सागरी सेतू? : वांद्रे वर्सोवा सागरी सेतू हा मुंबईतील दुसरा सागरी सेतू असणार आहे. हा सेतू अंधेरीतील वर्सोवा येथे सुरू होणार असून तो कार्टर रोड जुहू मार्गे वांद्रापर्यंत पोहोचणार आहे. हा पूल वांद्रे ते वरळी या आधीच्या सी-लिंकला जोडला जाणार आहे. हे अंतर सुमारे 17.17 किलोमीटर इतके आहे.

सागरी सेतूचे लोकेशन

कोणत्या कंपनीला मिळाले पूलाचे कंत्राट? : वांद्रे वर्सोवा सागरी सेतू प्रकल्पाचे काम आधी रिलायन्स इन्फ्रास्ट्रक्चर या कंपनीला देण्यात आले होते. इटलीच्या एका कंपनीबरोबर रिलायन्स हे काम भागीदारीने पूर्ण करणार होते. मात्र वेळेत काम होऊ न शकल्याने रिलायन्स इन्फ्रास्ट्रक्चरने यातून माघार घेतली. आता संपूर्ण काम इटलीच्या कंपनीला देण्यात आले आहे. इटलीची ही कंपनी आणखी एका भारतीय कंपनीला सोबत घेऊन या प्रकल्पाचे काम करत आहे.

वाहतुकीची समस्या दूर होणार : वांद्रे वर्सोवा सागरी सेतूमुळे मुंबईकरांची वाहतूक कोंडीतून सुटका होणार आहे. वांद्रे, वर्सोवा आणि वरळी परिसरात दररोज 4 ते 5 लाख वाहनांची ये - जा होत असते. या प्रकल्पानंतर या वाहनांना प्रवासासाठी लागणाऱ्या वेळेत बचत होणार आहे. हा दीड तासांचा प्रवास 30 मिनिटांवर येणार असल्याने प्रवासी या प्रकल्पाच्या पूर्ततेची वाट पाहत आहेत.

या ठिकाणी असेल जोडमार्ग : वांद्रे वर्सोवा सागरी सेतू शहरातील विविध भागांना जोडणार आहे. त्यामुळे या सेतूवर काही ठिकाणांवरून चढता आणि उतरता येणार आहे. या सेतूवर ऑटर क्लब, जुहू लिंक रोड आणि नाना नानी पार्क या ठिकाणी जोडमार्ग असणार आहेत. तर वांद्रे कार्टून रोड, जुहू कोळीवाडा आणि नाना नानी पार्क येथे टोल बूथ असणार आहेत.

हेही वाचा :

1. Mumbai Trans Harbor Link : शिंदे, फडणवीसांनी केली मुंबई ट्रान्स हार्बर लिंकची पाहणी