मुंबई : कसबा पेठच्या भाजप आमदार मुक्ता टिळक आणि पिंपरी चिंचवडचे भाजप आमदार लक्ष्मण जगताप यांच्या निधनाने कसबा पेठ व पिंपरी चिंचवड या विधानसभेच्या दोन जागा रिक्त झाल्या आहेत. या जागेवर २६ फेब्रुवारी रोजी मतदान होत असून २ मार्च रोजी मतमोजणी होणार आहे. भाजप नेत्यांकडून या दोन्ही जागा बिनविरोध करण्यासाठी प्रयत्न केले जात आहेत. परंतु शिवसेना, काँग्रेस तसेच राष्ट्रवादी काँग्रेस इथे निवडणूक घेण्यास उत्सुक आहे. याबाबत बोलताना अजित पवार म्हणाले की, प्रत्येकाला आपापली तयारी करण्याची मुभा आहे.
शिवसेना आणि कॉंग्रेसशी बोलणार : पिंपरी- चिंचवड विधानसभा संदर्भात ८ ते ९ लोकांनी उमेदवारी मागितली आहे. त्यांच्याशी मी प्रत्यक्षात बोलल्यानंतर निर्णय घेतला जाईल. तसेच कसबापेठमध्ये काँग्रेस तयारी करत आहे. महत्त्वाचे म्हणजे, काँग्रेस व राष्ट्रवादी काँग्रेसची आघाडी असताना कसबापेठ ही विधानसभा जागा काँग्रेसच्या वाट्याला होती. तरीसुद्धा पुण्यात गेल्यानंतर मी सहकार्याशी बोलेन. गुरुवार व शुक्रवार दोन दिवस आपण पुण्यात जाणार आहोत. त्यानंतर सहकाऱ्यांसह शिवसेना आणि काँग्रेसच्या नेत्यांशी सुद्धा बोलणार आहेत, असे अजित पवार म्हणाले.
उद्या महत्त्वाची बैठक : उद्या विधिमंडळात १ वाजता काँग्रेसच्या विधानसभा व विधानपरिषद आमदारांची बैठक होणार असून या बैठकीमध्ये कसबा पेठ आणि पिंपरी-पोटनिवडणूक संदर्भामध्ये चर्चा होणार आहे. असे सांगत मी निवडणूक लढवण्यावर ठाम आहे असेही पवार म्हणाले. कारण कोल्हापूर, पंढरपूर, देगलूरला ज्या पद्धतीने पोटनिवडणुका झाल्या त्या पद्धतीने ह्या सुद्धा पोटनिवडणूका व्हायला पाहिजेत. प्रत्येकाला आपापले मत मांडण्याचा अधिकार असून त्याबाबत नंतर विचार केला जाईल असेही ते म्हणाले. पण हे सर्व विचार अजित पवार यांचे असले तरी अखेरच्याक्षणी राष्ट्रवादी काँग्रेसचे सर्वेसर्वा शरद पवार याबाबत काय निर्णय घेतात यावरही बरच काही अवलंबून असणार आहे.
हेही वाचा: Shivsena-VBA Alliance : काँग्रेस, राष्ट्रवादीसोबतचा आंबेडकरांचा पंगा ठाकरे गटाला ठरतोय डोकेदुखी
