मुंबई : जोगेश्वरी (पूर्व) येथे इमारतीवरून पडलेली लोखंडी सळी अंगावर पडल्याने महिलेचा व तिच्या ७ वर्षीय मुलीचा मृत्यू झाल्याची घटना घडली आहे. जोगेश्वरी, पूर्व येथे शनिवारी सायंकाळी ही घटना घडली. यात रिक्षात बसलेल्या मायलेकीच्या अंगावर लोखंडी सळी पडली. यानंतर जबर जखमी झालेल्या या दोघांना तत्काळ रुग्णालयात नेण्यात आले. परंतु त्यात महिलेचा मृत्यू झाला. तर तिची लहान मुलगी गंभीर जखमी झाल्याने तिच्यावर उपचार सुरू असताना तिचाही मृत्यू झाला आहे.
एआयएम ग्रुप व विकासक मलकानी डेव्हलपर्सच्या इमारतीचे बांधकाम, झोपडपट्टी पुनर्विकास योजनेअंतर्गत, जोगेश्वरी पूर्वेतील गुंफा रोडवर सुरू आहे. हे बांधकाम सुरू असलेल्या इमारतीखाली शनिवारी संध्याकाळी एक रिक्षा उभी होती. त्यात एक महिला आपल्या ७ वर्षाच्या लहान मुलीसोबत बसली होती. त्या दरम्यान अचानक इमारतीवरून एक लोखंडी सळी रिक्षावर पडल्याने मोठा अपघात झाला. या घटनेत या माय लेकी दोघी गंभीर झाल्या. या दोघींनाही तात्काळ रुग्णालयात उपचारासाठी नेण्यात आले. पण तिथे नेल्यावर डॉक्टरांनी महिलेला मृत घोषित केले. तर मुलीची प्रकृती फार गंभीर होती. तिच्यावर उपचार सुरू करण्यात आले. पण उपचारादरम्यान तिचाही मृत्यू झाला.
आई पाठोपाठ मुलीचाही मृत्यू घटनेची माहिती मिळताच जोगेश्वरी पोलिस तातडीने घटनास्थळी पोहचले व त्यांनी या दोघींना घेऊन मुंबई महानगरपालिकेच्या ट्रॉमा केअर रुग्णालयात दाखल केले. परंतु त्या महिलेचा मृत्यू झाला होता व तिची ७ वर्षीय मुलगी अयात आसिफ शेख ही मृत्यूशी झुंज देत होती. तिची अवस्था फार नाजूक झाल्याने अयातच्या नातेवाईकांनी तिला महानगरपालिकेच्या रुग्णालयातून कोकिलाबेन रुग्णालयात दाखल केले. पण, उपचारादरम्यान तिचाही मृत्यू झाला आहे.
बांधकामांमुळे नागरिकांचे प्राण धोक्यात एकीकडे मुंबई मोठ्या प्रमाणात विकास कामांचे प्रकल्प सुरू असताना, दुसरीकडे उपनगरात विविध ठिकाणी एसआरए प्रकल्पांतर्गत मोठमोठी काम चालू आहेत. परंतु अशा घटना घडल्याने पुन्हा एकदा सुरक्षेचा प्रश्न एरणीवर आला आहे. असे प्रकल्प राबवताना सुरक्षेच्या दृष्टिकोनातून हव्या तश्या उपाययोजना नसल्याने विकासकाचे सुद्धा दुर्लक्ष होत असल्याचे समोर आले आहे. या प्रकरणी जोगेश्वरी पोलिस अधिक तपास करत असून त्याप्रमाणे पुढील कारवाई करण्यात येणार असल्याचे सांगण्यात आले आहे. अचानक झालेल्या माय लेकीच्या मृत्यूच्या या घटनेमुळे परिसरात शोकाकूल वातावरण आहे.
