पश्चिम रेल्वे मार्गावरील एसी लोकलच्या तिकीटदरात वाढ; 'असे' आहेत दर

२५ जून २०१८ पासून भाडेवाढ करण्यात येणार होती. मात्र, ६ महिन्यांसाठी भाडेवाढ पुढे ढकलण्यात आली. त्यामुळे गेल्या डिसेंबर महिन्यापासून भाडेवाढ होण्याची शक्यता होती. अखेर या एसी लोकलचे १ जूनपासून १.३ पटीने तिकीट दर वाढविण्याचा निर्णय रेल्वे मंत्रालयाने घेतला.

मुंबई - पश्चिम रेल्वे मार्गावर धावणाऱ्या पहिल्या एसी लोकलच्या तिकीट दरात आजपासून दरवाढ करण्यात आली आहे. यापूर्वी एसी लोकलचे तिकीट प्रथम श्रेणीच्या तिकीट दरांपेक्षा १.२ पटीने आकारले जात होते. आजपासून हे दर १.३ पटीने आकारण्यात येणार आहे.

गेल्या २५ डिसेंबर २०१७ ला पश्चिम उपनगरीय मार्गावर देशातील पहिली एसी लोकल सुरू झाली होती. एसी लोकलचे पहिल्या ६ महिन्यांसाठीचे किमान तिकीट जीएसटीसह ६० रुपये, तर कमाल तिकीट २०५ रुपये ठेवण्यात आले होते. २५ जून २०१८ पासून भाडेवाढ करण्यात येणार होती. मात्र, ६ महिन्यांसाठी भाडेवाढ पुढे ढकलण्यात आली. त्यामुळे गेल्या डिसेंबर महिन्यापासून भाडेवाढ होण्याची शक्यता होती. अखेर या एसी लोकलचे १ जूनपासून १.३ पटीने तिकीट दर वाढविण्याचा निर्णय रेल्वे मंत्रालयाने घेतला.

आर्थिक वर्ष २०१८-१९ मध्ये एसी लोकलमुळे १९ कोटी रुपयांचा महसूल पश्चिम रेल्वेच्या तिजोरीत जमा झालेला आहे, तर यंदा एप्रिल महिन्यात १ कोटी ८४ लाखांचा महसूल एसी लोकलमुळे प्राप्त झाला आहे. पश्चिम रेल्वेवर १ नोव्हेंबर २०१८ पासून लागू करण्यात आलेल्या नविन वेळापत्रकात एसी लोकलच्या थांब्यात वाढ केलेली आहे. त्यामध्ये मरिन लाईन्स, चर्नी रोड, ग्रॅण्ट रोड, दहिसर, मीरा रोड, नायगाव आणि नालासोपारा स्थानकांचा समावेश आहे. एसी लोकलच्या थांब्यात वाढ केल्यामुळे अधिक महसूल रेल्वेला मिळालेला आहे.

अशी आहे भाडे वाढ

रेल्वे स्थानक जुने दर नवीन दर

1. मुंबई सेंट्रल ६० ६५
2. दादर ८५ ९०
3. बांद्रा ८५ ९०
4. अंधेरी १२५ १३५
5. बोरिवली १६५ १८०
6. वसई रोड १९५ २१०
7. विरार २०५ २२०