मुंबई - फुले शाहू आंबेडकर यांची विचारधारा कायम आपल्या भाषणातून मांडत इंदापूर या आपल्या विधानसभा मतदारसंघातच नव्हे तर राज्यातील शेतकरी कष्टकरी यांच्या प्रश्नाला वाचा फोडणारे माजी मंत्री हर्षवर्धन पाटील भाजपवासी झाले आहेत. 1995 साली त्यांनी पहिली विधानसभेची निवडणूक लढविली होती. त्यांना अपक्ष म्हणून घड्याळ हे चिन्ह मिळाले होते आणि या चिन्हावर ते विजयी झाले होते. तर आज ज्या पक्षाचे 'घड्याळ' हे चिन्ह आहे त्यांच्याच कारभारावर नाराज होऊन पाटील भाजपमध्ये प्रवेश करत आहेत.
हेही वाचा - हर्षवर्धन पाटलांनी पहिली निवडणूक लढवली होती 'घड्याळा'वर; असा आहे राजकीय प्रवास
हर्षवर्धन पाटील यांनी आपल्या आतापर्यंतच्या राजकीय कारकिर्दीत 3 वेळा अपक्ष म्हणून निवडणूक लढवली. तर तब्बल 19 वर्षे ते मंत्री राहिले. सुरुवातीला युतीच्या सरकारमध्ये साडेचार वर्षे आणि काँग्रेस राष्ट्रवादीच्या सरकारमध्ये तब्बल 14 वर्षे ते मंत्री होते.
राजकारणात येत असताना पाटील यांनी आपले चुलते माजी खासदार शंकरराव पाटील यांचा वारसा चालवला. त्याच आधारावर हर्षवर्धन पाटील यांनी राज्याच्या राजकारणात प्रवेश केला होता. तो कालावधी होता 1995 चा. याच काळात ते इंदापूरमधून अपक्ष म्हणून विधानसभेवर आले. त्यावेळी त्यांनी काँग्रेसकडून तिकीट मागण्याचा प्रयत्न केला होता. परंतु, काँग्रेसने तिकीट दिले नाही. ते सेना-भाजप पुरस्कृत अपक्ष म्हणून उभे राहिले. त्यावेळी ते प्रचंड बहुमताने निवडून आले होते. त्यावेळी त्यांना अपक्ष म्हणून घड्याळ हे चिन्ह मिळाले होते.
हेही वाचा - मूळ कार्यकर्त्यांच्या 'आऊटगोईंग'ची धाकधूक; भाजपला अंतर्गत कलहाची भीती
1995 ते 1999 या कालावधीत सेनेच्या मदतीने साडेचार वर्षे पाटील कृषी राज्यमंत्री म्हणून राहिले. पुढे युतीचे सरकार गेले आणि 1999 ला ते विमान या चिन्हावर अपक्ष म्हणून निवडून आले. त्यानंतर 1999 ते 2014 पर्यंत काँग्रेस राष्ट्रवादी काँग्रेसच्या सरकारमध्ये सहकार, पणन, संसदीय कामकाज आदी मंत्री म्हणून त्यांनी आपली कामगिरी बजावली.
'यामुळे' हर्षवर्धन पाटीलांनी सोडला काँग्रेसचा 'हात' -
- पुणे जिल्हा परिषदेच्या स्थायी समिती सदस्यपद हर्षवर्धन पाटील यांच्या कन्या अंकिता पाटील यांना मिळणे आवश्यक होते. यामध्ये काँग्रेस आणि राष्ट्रवादी जिल्ह्याच्या नेत्यांनी राजकारण केले आणि हे पद मिळू शकले नाही.
- इंदापूरची जागा राष्ट्रवादीला सोडली जाणार असल्याने त्यावर दुसरा मार्ग उरला नव्हता.
- काँग्रेसमध्ये मागील काही वर्षात त्यांना महत्त्वाच्या पदावर डावलण्यात आले, विधान परिषदेवर घेण्याऐवजी दुसऱ्याला घेण्यात आले.
- प्रदेशाध्यक्ष पद देण्याचे सांगण्यात आले होते. परंतु, तिथेही डावलले तर कार्याध्यक्ष पदावर यांच्यापेक्षा कमी अनुभव असलेल्या लोकांची वर्णी लावण्यात आली.
