मुंबई - देशाची आर्थिक राजधानी असलेल्या मुंबई शहराची लोकसंख्या दोन कोटींच्या जवळ जाऊन पोहचली आहे. मुंबईतील नागरिकांच्या आरोग्याचा प्रश्न लक्षात घेता मुंबई महानगरपालिका व राज्य शासनाकडून शहरात रुग्णालये सुरू आहेत. मात्र, ही रुग्णालये स्वतःच व्हेंटिलेटरवर असल्याची बाब समोर आली आहे. माहिती अधिकार (आरटीआय) कार्यकर्ता चेतन कोठारी यांनी माहिती अधिकारातून ही माहिती मिळवली.
मुंबईतील गोकुळदास तेजपाल रुग्णालयामध्ये एकूण १२ व्हेंटिलेटर आहेत. त्यापैकी ४ व्हेंटिलेटर सध्या कार्यान्वित नाहीत. कामा हॉस्पिटलमध्ये सुद्धा असेच चित्र आहे. या ठिकाणचे एक व्हेंटिलेटर, तर वांद्रे येथील नागरी सेवा केंद्रातील २ व्हेंटिलेटर निष्क्रिय आहेत. ही बाब माहिती अधिकारातून समोर आली आहे.
हेही वाचा - पीएमसी बँकेच्या संदर्भात आरबीआय व अर्थ मंत्रालयाशी संपर्क सुरू आहे - किरीट सोमय्या
नादुरुस्त व्हेंटिलेटरच्या बाबतीत रुग्णालय प्रशासनाकडून संबंधित विभागाकडे तक्रारी करण्यात आल्या आहेत. मात्र, रुग्णालयात येणारी रुग्णांची संख्या व त्यावर उपलब्ध असलेली उपचार यंत्रणा यांचा ताळमेळ सध्या बसत नसल्याचे समोर येत आहे.
