मुंबई - गेले नऊ महिने कोरोना विषाणूशी युद्ध सुरु आहे. कोरोना विषाणूचा प्रसार काही प्रमाणात कमी झाला असताना ब्रिटनमधून कोरोनाचा नवा स्ट्रेन समोर आला आहे. राज्यात या नव्या कोरोना स्ट्रेंनचे ८ रुग्ण पॉझिटिव्ह आल्याची माहिती आरोग्य मंत्री राजेश टोपे यांनी दिली आहे. यामुळे कोरोनानंतर नव्या स्ट्रेनचाही राज्यात शिरकाव झाला आहे.
राज्यात ८ रुग्ण पॉझिटिव्ह -
मार्चपासून कोरोना विषाणूचा प्रादुर्भाव सुरू आहे. राज्यात आतापर्यंत १९,३५,६३६ नागरिकांना कोरोनाची लागण झाली आहे. तर ४९,५८० रुग्णांचा मृत्यू झाला आहे. राज्यात ५२,०८४ सक्रिय रुग्ण असून १८,३२,८२५ कोरोना बाधित बरे होऊन घरी गेले आहेत. राज्यातील रुग्ण बरे होण्याचे प्रमाण ९४.६९ टक्के एवढे आहे. राज्यातील कोरोनाचा प्रादृर्भाव कमी होत असताना ब्रिटन येथे कोरोनाचा नवा स्ट्रेन आढळून आला आहे. त्यामुळे केंद्र सरकारने २३ डिसेंबरपासून भारतात येणारी विमानसेवा बंद केली आहे. २५ नोव्हेंबरपासून ब्रिटन युके येथून आलेल्या प्रवाशांचा शोध घेऊन चाचणी केली जात आहे. त्यापैकी राज्यातील ८ जणांना नव्या कोरोची लागण झाल्याचे समोर आले आहे. त्यापैकी मुंबईतील 5, पुणे, ठाणे आणि मीरा भाईंदरमधील प्रत्येकी एक जणांचा समावेश आहे. हे सर्व जण विलगीकरणात असून त्यांचे कॉन्टॅक्ट ट्रेसिंग सुरू आहे, अशी माहिती आरोग्य मंत्री राजेश टोपे यांनी दिली आहे.
मुंबईत ५ पॉझिटिव्ह रुग्ण -
मुंबई विमानतळावर २१ नोव्हेंबरपासून उतरलेल्या प्रवाशांना हॉटेलमध्ये क्वारंटाइन करण्यात आले आहे. काहींना भायखळा येथील कोविड सेंटरमध्ये ठेवण्यात आले आहे. त्यामधील २६ प्रवाशांना कोरोनाची लागण झाली होती. त्यापैकी १४ जणांचा अहवाल निगेटिव्ह आला आहे. सर्व २६ रुग्णांचे नमुने पुण्याच्या एनआयव्ही या प्रयोगशाळेकडे तपासणीसाठी पाठवण्यात आले होते. एनआयव्हीने दिलेल्या अहवालानुसार मुंबईमधील ५ जणांना कोरोनाच्या नव्या स्ट्रेनची लागण झाल्याचे समोर आले आहे. मुंबईमधील सेव्हन हिल रुग्णालयात नव्या स्ट्रेनचे रुग्ण आढळून आल्यास त्यांच्यावर उपचार करता यावेत म्हणून १०० बेडची व्यवस्था करण्यात आली असल्याची माहिती पालिकेच्या आरोग्य विभागाने दिली आहे.
