मुंबई - 'राज्यातील अडीच कोटी जनता पुरात अडकली आहे. राज्यातील परिस्थिती गंभीर असतानाही मुख्यमंत्री देवेंद्र फडणवीस यांनी लक्ष दिले नाही. ते महाजनादेश यात्रेत मस्त आहेत' असा गंभीर आरोप राष्ट्रवादी काँग्रेसचे प्रवक्ते नवाब मलिक यांनी केला आहे.
मलिक पुढे म्हणाले, आम्ही परिस्थिती सांगितल्यानंतर तिकडे जाण्याऐवजी मुख्यमंत्री मुंबईत भूखंड कोणाला द्यायचा, याचा निर्णय घेत बसले. आज ते कोल्हापूरला निघाले आहेत. मात्र, त्यांच्याच दिमतीला हजारो अधिकारी, कर्मचारी लागले आहेत. यामुळे लोकांच्या अडचणी आणखी वाढतील. सरकारने राजकारण बाजूला ठेवून आपत्ती व्यवस्थापन आणि इतर संबंधित यंत्रणेची मदत तत्काळ लोकांना मिळवून द्यावी, अशी मागणीही मलिक यांनी यावेळी केली.
राष्ट्रवादीचे लोकप्रतिनिधी एक महिन्याचा पगार पुरग्रस्तांना देणार-
राष्ट्रवादी काँग्रेस पक्षाच्या आमदार, खासदारांनी एका महिन्याचे वेतन पुरग्रस्तांसाठी देण्याचा निर्णय घेतला असल्याचे मलिक यांनी सांगितले. या शिवाय इस्लामपूर येथील शिबिरात ७२ हजार लोकांना मदत केली जात आहे. तर, पूरग्रस्तांच्या मदतीसाठी उपयुक्त सामानाचा पहिला ट्रक उद्या सकाळी पाठवला जाणार असल्याची माहितीही त्यांनी दिली.
