मुंबई - महाराष्ट्राची कुलस्वामीनी तुळजाभवानी देवीच्या खजिन्यातील अनेक मौल्यवान दाग-दागिने, वाहिलेल्या वस्तू व पुरातन नाणी गैरव्यवहाराची सीआयडीमार्फत चौकशी होणार आहे. याची माहिती आज गृहराज्यमंत्री दिपक केसरकर यांनी विधानपरिषदेत दिली.
तुळजाभवानी देवस्थानचा खजिना व भिवंडी तालुक्यातील वज्रेश्वरी देवी मंदिरातील दरोडा प्रकरणी सदस्य डॉ. नीलम गोऱ्हे यांनी लक्षवेधी सूचना मांडली होती. यावर 'कुलस्वामीनी श्री तुळजाभवानी देवस्थानचा खजाना व जामदार खान्यातील अति प्राचीन ऐतिहासिक व पुरातन सोन्या-चांदीच्या वस्तू, मौल्यवान अलंकार व प्राचीन नाणी यांचा काळा बाजार व गैरव्यवहार झाला आहे का? याबाबत अतिरिक्त जिल्हाधिकारी यांच्या अध्यक्षतेखाली त्रिस्तरीय चौकशी समिती नेमली आहे. या समितीचा अहवाल आल्यानंतर आवश्यकता असल्यास या संपूर्ण प्रकरणाची राज्य सीआडीमार्फत चौकशी केली जाईल', असे केसरकर यांनी सांगितले आहे.
भिवंडी तालुक्यातील वज्रेश्वरी देवीच्या मंदिरातील दरोडा प्रकरणी सहा आरोपींना अटक करण्यात आले आहे. तर इतर दोन आरोपी फरार आहेत. अटक करण्यात आलेल्या आरोपींकडून तीन लाख 78 हजार आठशे सहा रुपये रोख रक्कम, दोन मोटार सायकली, हत्यारे व इतर मुद्देमाल जप्त करण्यात आला आहे.
या गुन्ह्याचा तपास सुरु आहे. राज्यातील मंदिरे तसेच धार्मिक स्थळावरील चोऱ्या तसेच मौल्यवान मूर्ती व दागिने यांच्या चोऱ्यांना आळा घालण्यासाठी पोलीस महासंचालक कार्यालयामार्फत परिपत्रकाद्वारे सर्व पोलीस आयुक्त, पोलीस अधीक्षक यांना सविस्तर सूचना दिल्या आहेत. देवस्थान ट्रस्टनी सुरक्षा रक्षकांची मागणी केल्यास त्यांना महाराष्ट्र सुरक्षा दलामार्फत ती पुरवली जाईल, असे केसरकर यांनी सांगितले.
