मुंबई - येथील चुनाभट्टी पोलीस ठाण्याच्या हद्दीत गेल्या महिन्यात 7 जुलैला एका 19 वर्षीय तरुणीवर सामूहिक अत्याचार करण्यात आले होते. तर गुन्ह्याचा तपास चुनाभट्टी पोलीस ठाण्यातील तत्कालीन तपास अधिकारी दीपक सुर्वे यांनी फिर्यादी यांना जातीवाचक शिवीगाळ व अपमानास्पद वागणूक दिली, असे फिर्यादीचे वकील अॅड. नीतीन सातपुते यांनी स्पष्ट केले होते. यानंतर सहाय्यक पोलीस आयुक्त यांनी आदेश दिल्यानुसार तत्कालीन तपास अधिकारी दीपक सुर्वे यांच्यावर चुनाभट्टी पोलीस ठाणे येथे अनुसूचित जाती-जमाती अत्याचार प्रतिबंधक कायदा अन्वये तक्रारदार पीडितेचा भाऊ यांनी तक्रार दाखल केली. यानुसार 31 ऑगस्ट रोजी गुन्हा दाखल झाला.
हेही वाचा - चुनाभट्टी बलात्कार प्रकरणी पोलिसांचे सहकार्य नाही; तपास अधिकाऱ्यांना निलंबित करण्याची मागणी
चेंबूर परिसरातील लाल डोंगर येथे आपल्या भावाकडे काही दिवसांपूर्वी गावाकडून आलेल्या एका 19 वर्षीय तरूणीवर 7 जुलै रोजी सामूहिक अत्याचार करण्यात आले होते. दरम्यान, मुलीला वैद्यकीय उपचाराकरिता नातेवाईकानी औरंगाबाद येथील शासकीय रुग्णालयात दाखल केले होते. येथे उपचारादरम्यान मुलीवर सामूहिक अत्याचार झाल्याचे निष्पन्न झाले. मात्र, दीर्घ उपचारानंतर 28 ऑगस्ट रोजी पीडित तरुणीचे निधन झाले.
हेही वाचा - एक महिना मृत्यूशी झुंज दिल्यानंतर 'तिचा' मृत्यू; मात्र आरोपी अद्याप मोकाटच
तत्पूर्वी, औरंगाबादच्या बेगमपुरा पोलीस ठाण्यामध्ये गुन्हा दाखल करण्यात आला. हे प्रकरण मुंबईतील चुनाभट्टी पोलिस ठाण्याच्या हद्दीत घडल्याने औरंगाबाद बेगमपुरा पोलीस ठाणे येथून मुंबईतील चुनाभट्टी पोलीस ठाण्यामध्ये तपासाकरिता गुन्हा वर्ग करण्यात आला. या संपूर्ण प्रकिये दरम्यान, पीडित तरुणीच्या नातेवाईकांना तपास अधिकारी प्रभारी दीपक सुर्वे यांनी जातीवाचक शिवीगाळ व अपमानास्पद वागणूक दिल्याचे फिर्यादीचे वकील यांनी म्हटले होते.
