मुंबई - आरे कारशेडच्या कामाला स्थगिती दिल्यानंतर बुधवारी मुख्यमंत्री उद्धव ठाकरे यांनी आरेतील झाडांच्या कत्तलीची चौकशी करण्यासाठी समिती स्थापन केली आहे. अर्थ विभागाच्या अप्पर मुख्य सचिवांच्या अध्यक्षतेखाली ही समिती स्थापन करण्यात आली आहे. येत्या 15 दिवसात याबाबतचा अहवाल सादर करण्याचे आदेश समितीला देण्यात आले आहेत.
मुख्यमंत्री उद्धव ठाकरे यांच्या अध्यक्षतेखाली बुधवारी मंत्रिमंडळाची बैठक पार पडली. त्यात हे आदेश देण्यात आल्याचे सूत्रांनी सांगितले. आरेमध्ये कारशेड उभारण्यासाठी 2 हजार 100 झाडांची कत्तल करण्यात आली होती. त्याची चौकशी होणार होणार आहे. कुणाच्या आदेशावरून ही झाडे तोडण्यात आली? एवढ्या मोठ्या प्रमाणावर झाडे तोडण्याची गरज होती का? कारशेडसाठी आरेऐवजी दुसरा पर्याय शोधता आला नसता का? रात्रीच्यावेळीच झाडे तोडण्याची काय गरज होती? आदी प्रश्नांचा ऊहापोह ही समिती घेणार आहे. येत्या 15 दिवसात समितीचा अहवाल आल्यानंतरच पुढील कारवाई करण्यात येणार आहे.
हेही वाचा - शनिवारपासून मध्य रेल्वेचे नवीन वेळापत्रक लागू
आरेत अजून किती झाडं तोडण्याची गरज आहे? झाडे न तोडताही काही पर्याय आहे का? आदींचा शोधही ही समिती घेणार असल्याचे सूत्रांनी सांगितले. त्यामुळे या समितीच्या अहवालाकडे महाराष्ट्राचे लक्ष लागले आहे.
मुख्यमंत्रिपदाचा पदभार स्विकारल्यानंतर उद्धव ठाकरे यांनी आरे कारशेडच्या कामाला स्थगिती दिली होती. मात्र, हा प्रकल्प सुरूच राहणार असल्याचेही त्यांनी स्पष्ट केलं होते. त्यानंतर त्यांनी आरेच्या आंदोलनातील कार्यकर्त्यांवरील गुन्हे मागे घेण्याचे आदेशही दिले होते. त्यामुळे आरे आंदोलकांनी समाधान व्यक्त केले होते.
हेही वाचा - 'नाल्यांमध्ये जाणारा कचरा रोखण्यासाठी झोपडपट्टीतील गटारांवर जाळ्या बसवा'
दरम्यान, आरे कारशेडच्या कामाला स्थगिती देण्यात आल्याने त्यावर भाजपने सडकून टीका केली होती. हे सरकार विकास कामांना रोखण्याचे काम करत आहे. राज्याच्या प्रगतीसाठी ते मारक असल्याची टीका विरोधी पक्षनेते देवेंद्र फडणवीस यांनी केली होती.
