BMC Warning to Mumbaikars: होळीसाठी झाडे तोडल्यास दंड, कैद होणार - पालिकेचा मुंबईकरांना ईशारा

मुंबईमध्ये होळी या सणाच्या पूर्वी मोठ्या प्रमाणात झाडे तोडली जातात. झाडे तोडणाऱ्याकडून दंड वसूल केला जातो. तसेच कैदेची शिक्षा होते. त्यामुळे मुंबईकरांनी झाडे तोडू नयेत, असे आवाहन मुंबई महानगरपालिका प्रशासनाकडून करण्यात आले आहे.

मुंबई : मुंबईमध्ये लोकसंख्येच्या प्रमाणात झाडांची संख्या कमी आहे. शहरात केवळ ३० लाख झाडे आहेत. यामुळे स्वच्छ हवा आणि ऑक्सिजनची नेहमीच समस्या असते. यासाठी महापालिका मुंबई हिरवीगार करण्याचा प्रयत्न करत आहे. त्यासाठी पालिकेने कृती आराखडा तयार केला असून इमारतीच्या टेरेसवर, खिडकीमध्ये हिरवळ करण्याचा निर्णय घेतला आहे. त्याचप्रमाणे कमी जागेत जास्त झाडे लावण्यासाठी मियावादी पद्धतीने झाडे लावण्याचे निश्चित केले आहे.

झाडे तोडीची माहिती द्या : मुंबईमध्ये एकीकडे झाडांची संख्या कमी असताना होळी या सणाच्या निमित्ताने झाडे तोडली जातात, अशी झाडे तोडणे बेकायदेशीर आहे. वृक्षतोड केल्यास गुन्हा दाखल केला जातो. मुंबईत कोठेही वृक्षतोड होत असल्याचे आढळल्यास, नागरिकांनी महानगरपालिका विभाग कार्यालयातील उद्यान विभागाच्या अधिकाऱ्यांना, स्थानिक पोलीस ठाण्याला कळवावे, असे आवाहन महानगरपालिका प्रशासनाने केले आहे. होळी सणासाठी झाडांची कत्तल होऊ नये म्हणून महापालिका सतर्क झाली आहे. होळीसाठी झाडे तोडल्यास कारवाई होणार आहे.