मुंबई - 'मराठा समाजाला आमच्या सरकारने आरक्षण दिले होते. त्यांना आता मान्यता मिळत नाही. हे सरकार काहीच काम करत नाही. सगळेच केंद्राकडे मदत मागतात. अशोक चव्हाण यांना तर सवयच लागली आहे. जर तुमचा अभ्यास बरोबर असेल, तर असे का झाले? कोणी मराठा आरक्षणासाठी आंदोलन करत असतील, तर आम्ही त्यांच्याबरोबर आहोत. माझ्या मनात अजित पवारांविषयी अनेक प्रश्न आहेत', असे भारतीय जनता पक्षाचे प्रदेशाध्यक्ष चंद्रकांत पाटील यांनी म्हटले आहे.
'मराठा आरक्षणासाठी पुनर्विचार याचिका दाखल करण्यास उशीर का झाला?'
'या सरकारला हे आरक्षण टिकवता आले नाही. मराठा आरक्षणासाठी पुनर्विचार याचिका दाखल करण्यास उशीर का झाला? याचे उत्तर आधी दिले पाहिजे. ओबीसीच्या आरक्षणाबाबतही असेच झाले आहे. कशासाठी हा उशीर होतो? हे संबंधितांनी सांगितले, पुनर्विचार याचिकेशिवाय पर्याय नाही. तसे केले तरच या गोष्टी पुढे जातील. हे सर्व करताना वेळ लागणार आहे. राज्य सरकारने याबाबत उशीर करणे योग्य नव्हते', असे चंद्रकांत पाटलांनी म्हटले आहे.
'पेट्रोल वाढीबाबत राज्य सरकारने कर कमी करावा'
'मराठा आरक्षणासाठी कोणीही आंदोलन करीत असतील, तर आम्ही त्यांच्यासोबत आहोत. यात कोणतेही राजकारण नाही. आंदोलन करायचेच, तर काॅंग्रेसने वर्षा किंवा मोतोश्रीच्या बाहेर करावे. महाविकास आघाडी सरकारच्या विरोधात आंदोलने करावे. पेट्रोल वाढीबाबत राज्य सरकारने कर कमी करावा. किंमती आटोक्यात येतील', असेही ते म्हणाले.
अजित पवारांना टोला
'मी सर्वांचाच आदर करतो. मुख्यमंंत्री उद्धव ठाकरे यांचाही मी आदर करतो. माझ्या मनात अजित पवारांविषयी खूप प्रश्न आहेत. काही आमदारांची पत्रे तुम्ही आणली होती. ती ड्रॉवरमधून कोणी काढली? हा माझा प्रश्न आहे', असा टोलाही त्यांनी उपमुख्यमंत्री अजित पाटील यांना लगावला.
हेही वाचा - जागतिक पर्यावरण दिन : संगमनेर नगरपरिषदेला 'माझी वसुंधरा अभियान 2021' अंतर्गत उत्कृष्ट कामगिरीचा पुरस्कार
