मुंबई - गांधी घराण्याने योग साधनेकडे दुर्लक्ष केल्याने त्यांच्याकडे सध्या 'राजयोग' नसल्याचे वक्तव्य करत योगगुरू बाबा रामदेव यांनी राहुल गांधीवर टीका केली. गांधी घराण्यातील पंडीत नेहरू, इंदिरा गांधी यांनी योगाभ्यासाला महत्व दिले होते. मात्र, त्यांच्या पुढच्या पिढीने योगाभ्यासाकडे दुर्लक्ष केल्याने त्यांच्याकडे राजयोग राहीला नसल्याचे बाबा रामदेव म्हणाले. यावेळी त्यांनी योगासनांचे प्रात्यक्षिकही करून दाखवले.
येत्या २१ जूनला जगभरात जागतिक योग दिन साजरा होणार आहे. २१ जूनला नांदेड येथील कार्यक्रमात बाबा रामदेव यांच्यासह मुख्यमंत्री देवेंद्र फडणवीसही सहभागी होणार आहेत. या कार्यक्रमाची माहिती देण्यासाठी मंत्रालयात क्रीडामंत्री आशिष शेलार आणि बाबा रामदेव यांची संयुक्त पत्रकार परिषद पार पडली. यावेळी बाबा रामदेव बोलत होते. यावेळी बाबा रामदेव यांनी योगासनांचे प्रात्यक्षिकही करून दाखवले.
पत्रकार परिषदेला येण्यापूर्वी बाबा रामदेव यांनी विधान भवनात मुख्यमंत्री देवेंद्र फडणवीस यांची भेट घेतली. यावेळी बाबा रामदेव म्हणाले की, जागतिक सलोखा राखण्यासाठी योग जगभरात कामी येणार आहे. योग ही एक क्रीडा नसून लोकांच्या जीवन जगण्याचा मार्ग झाला पाहिजे. जगभरात योग स्वीकारला जात असून, त्याचे मूळ भारत आहे याचा आम्हाला अभिमान असला पाहिजे. २१ जून हा आंतराष्ट्रीय योग दिन साजरा होणार असून, महाराष्ट्र सरकारही नांदेड मध्ये योग दिन साजरा करणार आहे. ३६ जिल्ह्यातील ३५८ तालुक्यात योग दिन कार्यक्रम होणार असल्याने ही फार मोठी उपलब्धी आहे.
