मुंबई: शिवसेना नेते संजय राऊत यांनी इंधन दरवाढीवरून केंद्रीय अर्थमंत्री निर्मला सीतारामन यांच्यावर हल्लाबोल केला आहे. पेट्रोल-डिझेलची दरवाढ तुम्हाला धर्मसंकट वाटत असेल तर धर्माचे राजकारण करू नका, असे म्हणत पेट्रोल-डिझेलची दरवाढ रामराज्यात वावणाऱ्यांना शोभत नाही, असा टोलाही राऊत यांनी लगावला आहे. तर संकटापासून पळ काढणाऱ्या अर्थमंत्र्यांना पदावर राहण्याचा अधिकार नसल्याचा खोचक टोलाही राऊत यांनी निर्मला सीतारामन यांना लगावला आहे.
रावणाच्या श्रीलंकेतही इंधन स्वस्त
देशातील जनतेचे महागाईपासून रक्षण करणे हे कुठल्याही सरकारचे काम आहे. व्यापारात फायदा होतो की तोटा हे बघायला सरकार बसलेले नाही. आपण रामराज्यात राहतो. पण बाजूला असलेल्या सीता आणि रावण यांचा जन्म झालेल्या देशात म्हणजे नेपाळ आणि श्रीलंकेत पेट्रोल- डिझेल स्वस्त आहे. त्यामुळे पेट्रोल-डिझेलची दरवाढ रामराज्यात वावरणाऱ्यांना शोभत नाही, अशी टीकाही राऊत यांनी केली आहे.
मनमोहन सिंग नेहमी संकटाचा सामना करायचे
पेट्रोल-डिझेल धर्मसंकट वाटत असेल, तर धर्माचे राजकारण करू नका. भाजपला सत्ता श्रीरामाच्या नावावर म्हणजे धर्माच्या नावावर मिळाली आहे. राजकारणात धर्माला जास्त महत्त्व दिले जाते, असेही राऊत म्हणाले. पेट्रोल- डिझेल दरवाढीसंदर्भातील धर्मसंकट यूपीए सरकारवरही होते. पण माजी पंतप्रधान मनमोहन सिंग नेहमी संकटाचा सामना करायचे. तुम्ही तर पळ काढत आहात तर, असा खोचक टोला राऊत यांनी केंद्र सरकारला लगावला आहे
