मुंबई - शिवसेनेचे युवा नेते आदित्य ठाकरे बुधवारी शिवसेना उमेदवार यामिनी जाधव यांच्या प्रचारासाठी भायखळा येथे येणार आहेत. या मतदार संघात यामिनी जाधव यांना निवडून आणण्यासाठी महायुतीकडून जोरदार प्रयत्न सुरू आहेत.
भायखळा मतदार संघ दरवेळी नवीन आमदार देणारा मतदार संघ म्हणून ओळखला जातो. येथून काँग्रेसचे मधू चव्हाण आणि एमआयएमचे वारीस पठाण हे या ठिकाणी आमदार होते. यावेळी हे दोन्ही आजी-माजी आमदार निवडणुकीच्या रिंगणात उतरले आहेत. त्यांना शिवसेनेच्या यामिनी जाधव यांनी आव्हान उभे केले आहे.
हेही वाचा - विधानसभा २०१९ : आज अकोला, परतूर, पनवेलमध्ये पंतप्रधान मोदींच्या प्रचार सभा
यामिनी जाधव यांनी प्रचारफेऱ्या आणि घराघरात जावून मतदारांच्या भेटी घेण्यावर भर दिला आहे. यामिनी यांचे पती यशवंत जाधव हे महापालिकेत स्थायी समिती अध्यक्ष असल्याने त्यांना त्याचा फायदा होत आहे.
आदित्य ठाकरे यामिनी जाधव यांच्यासाठी भायखळ्यात जाहीर सभा घेणार असल्याने यामिनी जाधव यांना त्याचा निवडणुकीत फायदा होणार आहे.
