मुंबई - राज्यातील विधानसभा निवडणुकीच्या तारखा जाहीर झाल्यानंतरही भाजप आणि शिवसेना पक्षाच्या युतीची घोषणा अद्याप झाली नाही. असे असले तरी दोन्ही पक्षांनी मात्र प्रचाराला सुरुवात केली आहे. शनिवारी मुंबईतील चांदीवली विधानसभा मतदारसंघात शिवसेनेचा विजय संकल्प मेळावा आयोजित करण्यात आला होता. या मेळाव्यात युवा सेना अध्यक्ष आदित्य ठाकरे यांनी शिवसैनिकांना मार्गदर्शन केले. त्यावेळी त्यांनी चांदीवलीत सत्तापालट होणार असून या मतदारसंघाचा कायापालट करणार असल्याचे आश्वासन त्यांनी यावेळी दिले.
या विजय संकल्प मेळाव्यात आदित्य ठाकरे यांनी जनतेला शिवसेनेलाच निवडून देण्याच आवाहन केले. यावेळी दुसऱ्या पक्षातून शिवसेनेत येणाऱ्याबद्दल आदित्य यांना विचारणा केली असता, ज्यांना सेनेचे विचार पटतात ते शिवसेनेत येत आहेत. महाराष्ट्र भगवा होणार असून चांदीवलीतही सत्ता पालट होणार असल्याचा विश्वास त्यांनी यावेळी व्यक्त केला. युती उद्धव ठाकरे आणि सीएम सांगतील तेव्हा घोषित होईल. तसेच अजित पवार यांच्याबाबत प्रश्न केला असता, त्यांनी इतर पक्षांवर बोलणार नाही असे सांगितले. पक्षाने आदेश दिल्यास वरळीतून निवडणूक लढविण्यास तयार असल्याचे सूचक वक्तव्यही आदित्य ठाकरेंनी यावेळी केले.
