मुंबई- मराठी अभिनेत्री दिपाली सय्यद हिला फोन करून अहमदनगरला आल्यास तुझ्यासोबत हाथरस सारखी घटना घडवू शकतो, अशी धमकी देणाऱ्या संदीप वाघ या आरोपीला ओशिवरा पोलिसांनी अहमदनगर मधून अटक केली आहे.
पोलिसांकडून मिळालेल्या माहितीनुसार, अभिनेत्री दिपाली सय्यद हिला 4 ऑक्टोबर रोजी एका वाढदिवसाच्या पार्टीसाठी येण्याचे आमंत्रण संदिप वाघ याने दिले होते. मात्र यासाठी 1 लाख रुपये आपण मानधन घेत असल्याचं दीपाली सय्यद हिने फोनवर संबंधित व्यक्तीला सांगितल्यानंतर एक लाख रुपयात काय होणार आहे, अशी विचारणा करून दीपाली सय्यद हिच्यासोबत आरोपीने अश्लील भाषेत संभाषण केले होते.
हेही वाचा- चोराचे धाडस अन् पोलीस हैराण; जप्त केलेला ट्रक थेट पोलीस ठाण्यातून पळवला
यावर दीपाली सय्यदने संदीप वाघ या आरोपीला याबाबत जाब विचारला असता तू जर अहमदनगरला आलीस तर भर चौकात तुझ्यासोबत हाथरस सारखा प्रकार घडेल, अशी धमकी संदीप वाघने दिपाली सय्यदला दिली होती. यानंतर दिपाली सय्यदने ओशिवरा पोलीस ठाण्यामध्ये तक्रार दाखल केली होती. तक्रार दाखल केल्यानंतर ओशिवरा पोलिसांनी यासंदर्भात गुन्हा नोंदवून संबंधित फोनचा तपास केला आणि आरोपी संदीप वाघ याला अहमदनगर येथून अटक केली.
हेही वाचा- अश्लिल चित्रफित दाखवून अल्पवयीन मुलीची छेड; आरोपी अटकेत
