मुंबई - मुंबई महापालिका व सत्ताधारी शिवसेनेचा महत्वकांक्षी प्रकल्प असलेल्या कोस्टल रोडसाठी बोगदा खोदण्याचे काम सुरू आहे. मावळा या टीबीएम मशीनद्वारे हा बोगदा खोदण्यात येत असून १०० मीटरचे काम पूर्ण झाले आहे. खोदकामादरम्यान ४७ कंकणाकृती कडे उभारण्यात आले आहेत. या व्यतिरिक्त तात्पुरत्या स्वरुपातील ७ कंकणाकृती कडांचीही उभारणी मावळ्याच्या मदतीने करण्यात आली आहे, अशी माहिती महापालिकेच्या अतिरिक्त आयुक्त अश्विनी भिडे यांनी दिली.
हेही वाचा - मुंबई विद्यापीठाच्या बीकॉमच्या पाचव्या सत्राचे निकाल जाहीर
कोस्टल रोड प्रकल्प
दक्षिण मुंबईमधून पश्चिम उपनगरात जाण्यासाठी मोठ्या प्रमाणात वाहतूक कोंडी होते. त्यावर उपाय म्हणून महापालिका आणि सत्ताधारी शिवसेनेने कोस्टल रोड प्रकल्प हाती घेतला आहे. शामलदास गांधी मार्गावरील प्रिन्सेस स्ट्रीट उड्डाणपूल ते वरळी या दरम्यान १०.५८ किमी लांबीचा असणारा 'सागरी किनारा मार्ग' बांधल्यामुळे प्रवासाच्या वेळेत ७० टक्‍क्‍यांची, तर ३० टक्के इंधन बचत होणार आहे. पर्यावरण पूरकताही साधली जाणार आहे.
कोस्टल रोडवर २ किलोमीटरचे २ बोगदे खोदले जाणार आहेत. बोगदे प्रियदर्शनी पार्क ते नेताजी सुभाष मार्गालगत (मरिन ड्राईव्ह) असणाऱ्या 'छोटा चौपाटी'पर्यंत असणार असून ते 'मलबार हिल'च्या खालून जाणार आहेत. सदर दोन्ही बोगद्यांसाठीचे खोदकाम हे जमिनीखाली १० मीटर ते ७० मीटर एवढ्या खोलीवर करण्यात येत आहे. त्यासाठी मावळा या टीबीएम मशीनचा वापर केला जात आहे. बोगदे खोदण्याच्या कामाची सुरुवात मुख्यमंत्री उद्धव ठाकरे यांच्या हस्ते ११ जानेवारी रोजी करण्यात आली. बोगदे खणण्याच्या कामाचे १०० मीटरचे अंतर पूर्ण झाले आहे.
कसे असतील बोगदे
बोगदे खणण्यासाठी १२.१९ मीटर व्यास असणारे भव्य असे मावळा ही टीबीएम म्हणजेच 'टनेल बोरिंग मशीन' वापरण्यात येत आहे. ही टीबीएम मशीन ४ मजली इमारती एवढी उंच असून त्याची लांबी तब्बल ८० मीटर एवढी आहे. या मशीनची पाती ही प्रत्येक मिनिटाला साधारणपणे २.६ वेळा गोलाकार फिरू शकणारी आहे. 'मावळा' या संयंत्राचे प्रत्यक्ष प्रचलन हे संगणकीय पद्धतीने होत आहे. तर, 'मावळा' या संयंत्राची उर्जा क्षमता ही ७ हजार २८० किलोवॅट एवढी असून प्रकल्प कालावधी दरम्यान दररोज सरासरी ८ मीटर बोगदा खणला जाईल, अशी अपेक्षा आहे.
दोन्ही बोगदे हे दोन बाजूंच्या वाहतुकीसाठी, अर्थात येणाऱ्या व जाणाऱ्या वाहतुकीसाठी स्वतंत्रपणे उपयोगात येतील. सुरक्षेची व प्रतिबंधात्मक उपायोजना म्हणून दोन्ही बोगद्यांना जोडणारे एकंदर ११ छेद बोगदे (Cross Tunnel / Cross Passages) देखील महाबोगद्यांचा भाग असणार आहेत. दोन्ही महाबोगदे खणण्यासाठी प्रत्येकी साधारणपणे ९ महिने लागणार असून दोन्ही बोगद्यांसाठी २ महिन्यांचा अतिरिक्त कालावधी जमेस धरण्यात आला आहे. यानुसार महाबोगदे खणण्यासाठी सुमारे २० महिन्यांचा कालावधी लागणार आहे. मावळा या संयंत्राद्वारे बाहेर टाकण्यात येणाऱ्या पाण्याचा पुनर्वापर करता यावा यासाठी 'प्रक्रिया केंद्र' देखील प्रकल्पाच्या ठिकाणी उभारण्यात आले आहे. तर खोदकामातून निघणारे खडक व खडी याचा उपयोग भराव कामासाठी करण्यात येणार आहे.
हेही वाचा - फोटो मॉर्फ प्रकरण : चित्रा वाघ यांच्याकडून मुंबई सायबर पोलिसात तक्रार दाखल
