लातूर - जिल्ह्यात दिवसेंदिवस कोरोना रुग्णांची संख्या वाढत आहे. सोमवारी एकाच दिवशी 38 कोरोना रुग्णांची वाढ झाली आहे तर एका रुग्णाचा उदगीरमध्ये मृत्यू झाला आहे. एकीकडे अंमलबजावणीसाठी जिल्हा प्रशासनाच्या बैठकावर बैठका सुरू आहेत मात्र, दुसरीकडे कोरोनाबाधितांची संख्या वाढत आहे. 6 जुलै अखेर जिल्ह्यात उपचार घेत असलेल्या रुग्णांची संख्या 211, उपचाराने बरे झाले रुग्णांची संख्या 270, मृत्यू झालेल्या रुग्णांची संख्या 25 व आजपर्यंत जिल्ह्यातील एकूण कोरोना बाधित रुग्णांची संख्या 499 इतकी आहे.
कोरोनाची वाढती साखळी तोडण्यासाठी जिल्हा प्रशासनाकडून एक ना अनेक उपाययोजना अवलंबल्या जात आहेत. परंतु, कोरोनाबधितांचा आकडा हा वाढतच आहे. सोमवारी लातुरात 16, निलंगा येथे 17, अहमदपूर, औसा येथे प्रत्येकी 2 तर शिरूर अनंतपाळ येथे एका रुग्णाची भर पडली आहे. प्रलंबित अहवालपैकी निलंगा येथे तब्बल 16 रुग्ण पॉझिटिव्ह आले असल्याने 1 वर असलेली कोरोना बाधितांची संख्या थेट 17 वर गेली आहे. एका दिवसात सर्वोच्च वाढ ही सोमवारी झाली आहे.
सद्यस्थितीला 211 रुग्णांवर उपचार सुरू आहेत तर आतापर्यंत 25 जणांचा कोरोनामुळे मृत्यू झाला आहे. मृत्यूचे प्रमाण हे लातुर आणि उदगीर शहरात अधिक आहे. कोरोनावर मात करण्यासंदर्भात सोमवारीच पालकमंत्री अमित देशमुख यांनी जिल्हा प्रशासनातील अधिकाऱ्यांची बैठक घेतली आहे. दरम्यान, जिल्ह्यात लॉकडाऊन करण्याचा अधिकार हा सर्वतोपरी जिल्हाधिकारी यांना असल्याचे सांगितले आहे. मात्र, दिवसेंदिवस वाढत असलेल्या रुग्ण संख्येमुळे जिल्हाधिकारी जी. श्रीकांत काय निर्णय घेणार याकडे लक्ष लागले आहे.
रुग्णांची संख्या वाढत असल्याने खाजगी रुग्णालयातही सोय करण्याची प्रक्रिया सुरू आहे. जिल्ह्यातील सर्व बाजारपेठा सुरू आहेत. वाढत्या रुग्णसंख्येमुळे इतर जिल्ह्याप्रमाणे लातूरातही लॉकडाऊन होणार का याकडे लक्ष लागले आहे. आतापर्यंत जिल्ह्यात 25 जणांनी कोरोनामुळे मृत्यू झाला आहे.
