लातूर - कोरोना काळापासून माथाडी कामगार संघटनेने आपल्या विविध मागण्या शासन दरबारी मांडल्या आहेत. मात्र, याकडे शासनाकडून दुर्लक्ष होत आहे. त्यामुळे आज माथाडी कामगार संघटनेच्यावतीने बंदची हाक देण्यात आली आहे. लातूर कृषी उत्पन्न बाजार समितीत 800 हून अधिक कामगार बंदमध्ये सहभागी झाले असल्याने सर्व व्यवहार ठप्प आहेत.
'या' मागण्यांसाठी केला आहे बंद -
मराठवाड्यात लातूर कृषी उत्पन्न बाजार समिती महत्वाची बाजारपेठ आहे. येथे उस्मानाबाद, बीडसह कर्नाटक राज्यातूनही मोठ्या प्रमाणात शेती मालाची आवक असते. मात्र, गेल्या महिन्याभरात तब्बल तीन वेळा ही बाजार समिती बंद राहिली आहे. माथाडी कामगारांच्या कामात गुंड प्रवृत्तीच्या व्यक्तींचा शिरकाव होत आहे. यावर आळा घालावा, नाशिक येथील माथाडी कामगारांच्या लेव्हीचा प्रश्न मार्गी लावावा, माथाडी कामगारांना ये-जा करण्यासाठी रेल्वे पास मंजूर करावा, कामगारांच्या कर्जाच्या हप्त्याची माथाडी बोर्डाकडून कपात न होण्याबाबत विभागाने काढलेला आदेश रद्द करावा, माथाडी मंडळावर पूर्णवेळ चेअरमनची नेमणूक करावी, आशा ११ मागण्या माथाडी कामगार संघटनेने सादर केल्या आहेत. मात्र, याकडे दुर्लक्ष होत असल्याने शासनाचे लक्ष वेधून घेण्यासाठी बंद पुकारण्यात आला आहे.
800 कामगारांचा समावेश, व्यवहार ठप्प -
लातूर कृषी उत्पन्न बाजार समितीत 800 पेक्षा अधिक कामगार आहेत. शेतीमालाची वाहतूक करणे, वजन काटा करणे यासारखी कामे हे मजूर करतात. या कामगारांनी गेल्या महिन्यात मजुरी वाढवून देण्याच्या मागणीसाठी चार दिवस बाजार समिती बंद ठेवली होती. तर, आता माथाडी कामगारांच्या 11 मागण्या घेऊन पुन्हा बंद पुकारण्यात आला आहे. दिवसाकाठी येथील बाजार समितीमध्ये 49 हजार क्विंटल सोयाबीनची आवक होत असते. मात्र, सातत्याने बाजार समिती ही बंद असल्याने शेतकऱ्यांची अडचण होत आहे.
भारत बंदमध्येही घेतला होता सहभाग -
केंद्राच्या कृषी कायद्यांविरोधात दिल्लीमधील शेतकऱ्यांच्या आंदोलनाचा आज १९वा दिवस आहे. या आंदोलनादरम्यान ८ डिसेंबरला भारत बंद पाळण्यात आला होता. या भारत बंदलाही लातूर बाजार समितीने पाठिंबा देत व्यवहार बंद ठेवले होते. दरम्यान, आज दिल्लीतील शेतकरी एका दिवसाचे उपोषण करणार आहेत. तसेच, आज देशभरातील जिल्हाधिकारी कार्यालयांमध्ये आंदोलन करण्याचे आवाहनही शेतकऱ्यांनी केले आहे.
