लातूर - अखिल भारतीय नाट्य परिषदेचे शंभरावे वर्ष म्हणून नाट्य संमेलनाचे आयोजन करण्यात आले आहे. यंदा प्रथमच नाट्यसंमेलनाचे स्वरूप बदलण्यात आले असून राज्यातील 13 जिल्ह्यात हे नाट्य संमेलन पार पडणार आहे. त्यामुळे लातूरमध्येही आठ दिवस नाट्यसंमेलनाचा मेळा रंगणार आहे.
27 मार्च जागतिक रंगभूमीच्या दिनाचे औचित्य साधून या नाट्य संमेलनाचे आयोजन केले असल्याचे अखिल भारतीय नाट्य परिषदेचे अध्यक्ष प्रसाद कांबळी यांनी पत्रकार परिषदेत सांगितले. नाट्य चळवळ ही ग्रामीण भागापर्यंत पोहोचवण्यासाठी यंदा प्रथमच राज्यातील विविध भागात हे नाट्य संमेलन पार पडणार आहे. याची सुरुवात सांगली येथे होणार असून समारोप मुंबई येथे होणार आहे. दरम्यान, लातूरसह इतर 12 जिल्ह्यात हे नाट्य संमेलन पार पडणार आहे. 4 मे ते 10 मे या कालावधीत लातूरकरांना व्यवसायिक ख्यातनाम नाटकांचा आस्वाद घेता येणार आहे.
हेही वाचा - लातूरात 'ती' च्या सन्मानार्थ पुरुषांची रॅली
जिल्ह्यातील अमदपूर निलंगा आणि उदगीर या तालुक्यात नाट्यसंमेलन पार पडल्यानंतर ८ ते १० मे या तीन दिवसांत लातुरातील नागरिकांना नाटकांची मेजवानी राहणार आहे. आतापर्यंत नाटक हे विशिष्ट घटकापुर्ते मर्यादित मानले जात होते. मात्र, याची व्याप्ती आणि ग्रामीण कलाकारांना संधी मिळावी म्हणून असा अभिनव उपक्रम राबविण्याचे नाट्य परिषदेचे कार्यवाह शरद पोंक्षे यांनी सांगितले. संमेलनाचा समारोप हा मुंबई येथे होणार असून संमेलनाचे स्वागतध्यक्ष राष्ट्रवादीचे अध्यक्ष शरद पवार हे राहणार आहेत.
