कोल्हापूर - कळंबा तलावाच्या सांडव्यातून बाहेर पडणारे मासे पकडताना २ तरुण सांडव्याच्या पाण्यातून वाहून जाता जाता वाचले आहेत. येथील स्थानिक तरुणांनी या दोघांना वाचवले असून याची लाईव्ह दृश्ये ईटीव्ही भारतच्या हाती लागली आहेत.
मागील २४ तासांपासून सुरू असलेल्या मुसळधार पावसामुळे कळंबा तलाव भरलाआहे. त्यामुळे कळंबा तलावाच्या सांडव्यातून मोठ्या प्रमाणात पाणी बाहेर पडत आहेत. या पाण्यातून तलावातील मासेसुद्धा बाहेर येत असल्याने अनेकांनी येथे मासे पकडण्यासाठी गर्दी केली आहे. हेच मासे पकडत असताना २ तरुण सांडव्यातून वाहून जाता जाता वाचले.
सांडव्यामध्येच एक तुटलेल्या झाडाच्या फांद्यांमुळे ते त्याठिकाणी अडकले. मधोमध अडकलेल्या या दोघांनाही येथील स्थानिकांनी दोरीच्या साहाय्याने पाण्याच्या प्रवाहातून बाहेर काढले. मासे सापडत असल्याने ते पकडण्यासाठी आज सकाळपासूनच कळंबा तलावावर तरुणांची झुंबड लागली आहे. तरुणांची अशी हुल्लडबाजी बंद व्हावी म्हणून याठिकाणी स्थानिकांनी पोलीस बंदोबस्त ठेवण्याची मागणी केली आहे.
