कोल्हापूर - निवडणुकीचा भत्ता मागणाऱ्या शिक्षकांना धक्काबुक्की झालेल्या घटनेच्या पार्श्वभूमीवर शिक्षकांनी जिल्हाधिकारी दौलत देसाई यांना निवेदन देऊन संबंधित पोलीस निरीक्षक प्रकाश गायकवाड यांच्यावर कारवाई व्हावी तसेच संबंधित प्रांताधिकारी यांची चौकशी व्हावी, अशी मागणी करण्यात आली. शिवाय आम्हाला सन्मानाची वागणूक देता येत नसेल तर निवडणुकीची कामे देऊ नका, असेही शिक्षकांनी म्हटले आहे.
कोल्हापूरच्या गडहिंग्लज येथे निवडणुकीचा भत्ता मागणाऱ्या शिक्षकांना धक्काबुक्की झाल्याची घटना मंगळवारी घडली. २२ आणि २३ एप्रिल असे दोन दिवस पूर्णवेळ काम करूनही ठरल्या प्रमाणे २२०० रुपये न देता केवळ ३०० रुपये देत असल्याने संतप्त झालेल्या शिक्षकांनी जाब विचारण्याचा प्रयत्न केला. जाब विचारत असतानाच पोलीस निरीक्षक प्रकाश गायकवाड यांच्याकडून धक्काबुक्की करण्यात आली. शिवाय संबंधित प्रांताधिकारी यांनी सुद्धा आमच्याशी सन्मानपूर्वक वागणूक दिली नसल्याचे शिक्षकांनी म्हटले आहे. त्यानुसार आज जिल्हाधिकारी दौलत देसाई यांना निवेदन संबंधित घटनेची चौकशी व्हावी याबाबतचे निवेदन देण्यात आले. शिवाय जिल्हाधिकाऱ्यांनी सुद्धा घडलेल्या घटनेबद्दल दिलगिरी व्यक्त करत या घटनेची चौकशी करू, असे आश्वासन दिले, त्यानंतर संतप्त शिक्षक शांत झाले आहेत.
काय आहे हे प्रकरण -
गडहिंग्लज येथे मंगळवारी १०० हून अधिक शिक्षकांना निवडणुकीच्या कामासंदर्भात रिझर्व (राखीव) ठेवण्यात आले होते. राखीव शिक्षकांपैकी बऱ्याच शिक्षकांना प्रांत अधिकारी यांच्यासोबत कामगिरी देण्यात आली व बहुतांश शिक्षकांना २२ तारीख व २३ तारखेला पूर्णवेळ रात्री अकरा वाजेपर्यंत गडहिंग्लज येथे निवडणूक कार्यालयात थांबवून घेण्यात आले. निवडणूक कामकाज पूर्ण झाल्यानंतर दहा वाजता भत्ता मागत असताना भत्ता देय नसल्याचे संबंधित अधिकाऱ्यांच्याकडून सांगण्यात आले. अशावेळी काही शिक्षक घरी निघून गेले. पण बऱ्याच शिक्षकांनी भत्त्याची मागणी करण्याचा प्रयत्न केला. परंतु, याला कुठलीही दाद प्रशासनाकडून दिली नसल्याची तक्रार येथील शिक्षकांनी केली.
यावेळी याची विचारणा करत असताना अचानक एका पोलीस अधिकाऱ्याकडून भत्ता मागणाऱ्या शिक्षकाला धक्काबुक्की झाली. हा संपूर्ण प्रकार एका शिक्षकाने आपल्या कॅमेरात कैद केला. यावेळी सर्व शिक्षकांनी आपली एकजूट दाखवून पोलिसांची अरेरावी खपवून घेतली नाही. सर्वांनी याला विरोध करत प्रशासनाला शासनाने दिलेल्या नियमानुसार २२०० रुपये भत्ता देण्यास भाग पाडले.
