कोल्हापूर : आजकाल प्रत्येकालाच कॅमेराची आणि फोटोग्राफीची आवड आहे. याशिवाय अनेकांकडे त्यांचा खासगी कॅमेरा असल्याचे देखील पाहायला मिळतात. मात्र, बेळगाव जिल्ह्यातील एक व्यक्तीला कॅमेराची जितकी आवड आहे, तितकी कदाचित कोणालाही नसेल. या फोटोग्राफरला फोटोग्राफीची इतकी आवड की, त्यांनी आपल्या घराला देखील कॅमेराचे रूप दिले आहे. इतकेच नाही तर आपल्या मुलांची नावे देखील क‌ॅमेराप्रमाणे कॅनॉन, निकॉन आणि इपसॉन अशी ठेवली आहेत.
कर्नाटकातील बेळगाव येथी रवी होंगळ हे परिसरातील प्रसिद्ध फोटोग्राफर आहेत. मागील अनेक वर्षांपासून फोटोग्राफी हाच त्यांचा व्यवसाय आहे. या व्यवसायात त्यांनी स्वतःला इतके समर्पित केले आहे की, प्रत्येक गोष्टीत त्यांना कॅमेरा डोळ्यासमोर येतो. आता हेच पहा ना, त्यांनी आपल्या तिन्ही मुलांची नावे सुद्धा कॅमेरा कंपनीप्रमाणे ठेवली आहेत. मोठ्याचे नाव कॅनॉन, मधल्याचे निकॉन आणि सर्वात छोट्या मुललाचे इपसॉन, अशी नावे त्यांनी ठेवली आहेत. रवी होंगळ यांना एक मुलगी सुद्धा हवी होती, पण ती होऊ शकली नाही. मात्र, तसे झाले असते तर तिचं नाव सुद्धा त्यांनी ठरवून ठेवले होते.
हेही वाचा... मोदीजी देश तुमच्यासोबत... पण सत्य काय आहे सांगा; राऊतांचा पंतप्रधान मोदींना सवाल
रवी होंगळ यांच्या तिनही मुलांना आपले नाव असे इतरांपेक्षा वेगळे का ठेवले, याचे अजिबात वाईट वाटत नाही. याउलट वडिलांनी खूप चांगली नावे ठेवली असल्याचे ते म्हणतात.
मागील अनेक वर्षांपासून होंगळ या व्यवसायात आहेत. अगदी छोट्या छोट्या कामांची ऑर्डर घेत त्यांनी आपला व्यवसाय सुरू ठेवला. अनेक अडचणींवर मात करत त्यांनी आपले स्वप्न पूर्ण केले आहे. त्यांनी स्वतःचे घर सुद्धा बाहेरून कॅमेरासारखेच दिसावे असेच बांधले आहे.
रवी होंगळ यांची पत्नी सुद्धा त्यांना त्यांच्या कामात नेहमी मदत करत असतात. आपल्या पतीचे स्वप्न पूर्ण झाल्याचा आनंद त्यांच्या चेहऱ्यावर देखील स्पष्टपणे दिसून येतो. खरेतर प्रत्येकाचे आपल्या व्यवसायावर जीवापाड प्रेम असते. परंतु, रवी होंगळ यांच्यासारखे अपरिसिमित प्रेम क्वचितच पाहायला मिळते. त्यांच्या कॅमेरावरच्या या आगळ्या वेगळ्या प्रेमाची आता सर्वत्र चर्चा सुरू आहे.
हेही वाचा.... भारत-चीन सीमेवर तणाव; दुसरीकडे महाराष्ट्रात चीनची ५ हजार कोटींची गुंतवणूक
