कोल्हापूर - जगभरात कोरोनाचा कहर सुरू आहे. संपूर्ण यंत्रणा कोरोनावर मात करण्यासाठी सज्ज आहेच. शिवाय कोरोनाला मुळापासून नष्ट करण्यासाठी समाजातील प्रत्येक घटकाने कंबर कसलीय. यात गणपती बाप्पा कसे मागे राहतील? कोल्हापूरातील वैद्य कुटुंबातील 'बाप्पा' कोरोना रुग्णांची सेवा करत आहे. शिवाय कोरोनावर मात करण्यासाठी जनजगृती करत आहेत. पाचगाव रोडवरील आनंद प्राईड येथे राहणाऱ्या प्रसाद वैद्य यांनी 'सलाम कोरोना योध्यांना' या थीमवर घरगुती देखाव्याची सजावट केली आहे. अहोरात्र राबणाऱ्या मुख्यमंत्र्यांसह, पालकमंत्री, जिल्हाधिकारी, आयुक्त, डॉक्टर, नर्स, सफाई कर्मचाऱ्यांचे आभार या देखाव्याच्या माध्यमातून मानले आहे.
बाप्पा करताहेत कोरोना रुग्णांची सेवा; देखाव्यातून वैद्य कुटुंबीयांनी मानले यंत्रणा, प्रशासनाचे आभार
मुख्यमंत्री, पालकमंत्री,जिल्हाधिकारी, आयुक्त यांचे विशेष आभार
त्याला काय होतंय, म्हणत कोल्हापूरकरांची बेफिकिरी वाढलेली आहे. त्यामुळे रुग्णांची संख्या वाढत आहे. यंत्रणेवर मोठा ताण पडलेला असून देखील मुख्यमंत्री उद्धव ठाकरे राज्याची परिस्थिती कशी नियंत्रणात येईल? यासाठी प्रयत्न करत आहेत. तर जिल्हाधिकारी दौलत देसाई, पालकमंत्री सतेज पाटील, आयुक्त डॉ. मालिनाथ कलशेट्टी आणि जिल्हा पोलिस प्रमुख अभिनव देशमुख हे वारंवार जनतेला आवाहन करत आहे. त्याकडे काणाडोळा करून चालणार नाही. नियमांचे पालन करावे, असे आवाहन देखील या देखाव्याच्या माध्यमातून केले असल्याचे वैद्य यांनी सांगितले.
