वरिष्ठाच्या त्रासाला कंटाळून आरोग्य कर्मचाऱ्याची आत्महत्या; रुग्णालयातच घेतला गळफास

सध्या कोरोना या आरोग्य केंद्रात कोरोना प्रतिबंधात्मक लसीकरण सुरू आहे. कोरवी हे शनिवारी दिवसभर गावातील लसीकरण केंद्रावर सेवा बजावत होते. त्यानंतर सायंकाळी ते कोल्हापूरला गेले, पंरतु, त्याच दिवशी रात्र पाळी असल्याचे सांगत ते रात्री १० वाजता पुन्हा घराबाहेर पडले आणि अतिग्रे येथील आरोग्य उपकेंद्रात येऊन कोरवी यांनी गळफास घेतला.

कोल्हापूर- अतिग्रे येथील प्राथमिक आरोग्य उपकेंद्रातील आरोग्य सेवकाने वरिष्ठांच्या त्रासाला कंटाळून कार्यालयातच गळफास घेऊन आत्महत्या केली आहे. रमेश धोंडीराम कोरवी असे आत्महत्या करणाऱ्या आरोग्य सेवकाचे नाव आहे. कोरवी यांच्या खिशामध्ये एक चिठ्ठी सापडली आहे. यामध्ये त्यांनी वरिष्ठांच्या त्रासाला कंटाळून आत्महत्या करत असल्याचे कारण नमूद केले आहे.

या प्रकरणी आरोग्य सहाय्यक सुरेश वर्णे यांना पोलिसांनी ताब्यात घेतल आहे. मात्र घटनास्थळी कोणत्याही वरिष्ठ अधिकाऱ्याने भेट न दिल्याने नातेवाईंकांनी आक्रमक पवित्रा घेतला. वरिष्ठ आल्याशिवाय मृतदेह ताब्यात घेण्यास नातेवाईकांनी नकार दिला होता. त्यामुळे आरोग्य केंद्र परिसरात काही काळ तणावाचे वातावरण निर्माण झाले होते.

हातकणंगले तालुक्यातील अतिग्रे येथे जिल्हापरीषदेच्या हेरले प्राथमिक आरोग्य केंद्रा अंतर्गत एक उपकेंद्र आहे. कोल्हापूर येथील रमेश धोडींराम कोरवी(हरिओम नगर) हे आरोग्य विभागात गेल्या 18 वर्षापासुन आरोग्य सेवक म्हणून कार्यरत होते. तर गेल्या चार वर्षापासून ते हेरले प्राथमिक आरोग्य केंद्रात काम करत होते. त्यांच्याकडे अतिग्रे उपकेंद्राच काम देण्यात आले होते. सध्या कोरोना या आरोग्य केंद्रात कोरोना प्रतिबंधात्मक लसीकरण सुरू आहे. कोरवी हे शनिवारी दिवसभर गावातील लसीकरण केंद्रावर सेवा बजावत होते. त्यानंतर सायंकाळी ते कोल्हापूरला गेले, पंरतु, त्याच दिवशी रात्र पाळी असल्याचे सांगत ते रात्री १० वाजता पुन्हा घराबाहेर पडले आणि अतिग्रे येथील आरोग्य उपकेंद्रात येऊन कोरवी यांनी गळफास घेतला.

वरिष्ठाच्या त्रासामुळे कोरवी तणावात-

रविवारी सकाळच्या सुमारास कोरवी यांनी आत्महत्या केल्याचा प्रकार उघडकीस आला. रमेश यांच्या खिशामध्ये आत्महत्येपूर्वी लिहून ठेवलेली चिठ्ठी आढळली आहे. त्यामध्ये त्यांनी वरिष्ठ अधिकाऱ्यांच्या सततच्या त्रासाला कंटाळून आत्महत्या करत असल्याचा उल्लेख केला आहे. रमेश सतत तणावात होते. वरिष्ठ अधिकाऱ्यांकडून त्यांना कधी कधी २४ तास कामावार हजर राहण्यास सांगितले जात असत. त्यातून रजाही मिळत नव्हती, त्यामुळेच त्यांनी हे टोकाचे पाऊल उचलले असल्याचा आरोप कोरवी यांच्या नातेवाईकांनी केला आहे.

नातेवाईकांचा संताप; कारवाईनंतर मृतदेह ताब्यात-

या प्रकरणी आरोग्य विभागातील वरिष्ठ अधिकारी सुरेश वर्णे यांच्यावर कडक कारवाई करावी, अशी मागणी कोरवी यांच्या नातेवाईकांनी केली. तसेच आत्महत्येची घटना घडल्यानंतर तब्बल 10 तास उलटून गेले तरी, वरिष्ठ अधिकाऱ्यांनी या ठिकाणी भेट दिली नसल्याने मृताचे नातेवाईक अधिकच संतप्त झाले. त्यामुळे वरिष्ठ आल्याशिवाय मृतदेह ताब्यात घेणार नसल्याचे मृताचे चुलते वसंत कोरवी यांनी स्पष्ट केले. यावर पोलिसांनी तत्काळ कारवाई करत संबंधित संशयित सुरेश वर्णे याला चौकशीसाठी ताब्यात घेण्याची कारवाई केली. त्यामुळे नातेवाईकांनी कोरवींचा मृतदेह ताब्यात घेतला असल्याची माहिती पोलिसांनी दिली.