'त्या' पाचजणी पॉकेटमनी मधील पैशातून रुग्णांच्या नातेवाईकांना देताहेत मोफत नाश्ता

कोल्हापूर काही मुली पॉकेटमनीतील पैशातून सीपीआर रुग्णालयातील रुग्णांना तसेच त्यांच्या नातेवाईकांना रोज सकाळी घरी बनवलेला सकस नाश्ता देण्याचे काम करत आहेत. मिळालेल्या पॉकेटमनीमधून पिझ्झा, बर्गर, आईस्क्रीम खाण्याची त्यांची सवय होती. पण, एक दिवस कोविड लसीकरणाच्या चौकशीसाठी त्या सीपीआर रुग्णालयात आल्या.

कोल्हापूर - जगात भारी अशी ओळख असलेल्या कोल्हापुरात नेहमीच काहीतरी खास पाहायला मिळत आणि याचीच प्रचिती पुन्हा एकदा आली असून काही मुली पॉकेटमनीतील पैशातून सीपीआर रुग्णालयातील रुग्णांना तसेच त्यांच्या नातेवाईकांना रोज सकाळी घरी बनवलेला सकस नाश्ता देण्याचे काम करत आहेत. मिळालेल्या पॉकेटमनीमधून पिझ्झा, बर्गर, आईस्क्रीम खाण्याची त्यांची सवय होती. पण, एक दिवस कोविड लसीकरणाच्या चौकशीसाठी त्या सीपीआर रुग्णालयात आल्या.

लसीकरणाच्या चौकशीसाठी सीपीआरमध्ये आल्यावर रुग्णांच्या नातेवाईकांचे होत असलेले हाल पाहून त्यांनी घेतला निर्णय

कोल्हापुरातील दुधाळी-हरीमंदिर परिसरात एकाच अपार्टमेंटमध्ये राहणाऱ्या श्रुती चौगुले, अर्पिता राऊत, श्रेया चौगुले, आचल कट्यारे आणि नेहा पाटील या पाच मैत्रिणी लसीकरणाच्या चौकशीसाठी सीपीआर रुग्णालयात आल्या होत्या. तेव्हा त्यांना सीपीआर रुग्णालयात तेथील रुग्णांच्या नातेवाईकांची होत असलेली धावपळ पाहायला मिळाली. या धावपळीच्या दरम्यान अनेकांच्या पोटाचे हाल होत असतील हाच विचार तिच्या डोक्यात आला. त्यानंतर त्यांनी रुग्णांना आणि रुग्णांच्या नातेवाईकांना दररोज नाश्ता, फळे, पाणी द्यायचे ठरवले. दोन दिवस या मुली सीपीआर रुग्णालयात ज्या ठिकाणी कोरोना रुग्णांवर उपचार सुरू आहेत त्या वॉर्डच्या बाहेर आपल्या दुचाकी गाडीवरून नाश्ता घेऊन येत आहेत आणि नातेवाईकांना देत आहेत. त्यांनी आपल्या या छोट्या ग्रुपला 'ड्रीम टीम' असे नाव दिले आहे.

सुरुवातीला घरच्यांनीही केला विरोध

कोल्हापुरातील सीपीआर रुग्णालय पूर्णपणे कोविड रुग्णालय म्हणून जाहीर करण्यात आले आहे. आजही या रुग्णालयात 400 च्या आसपास रुग्ण उपचार घेत आहेत. अनेक गंभीर स्थितीतील रुग्णही आहेत. असे असताना कोरोना संसर्गाच्या भीतीमुळे या मुलींच्या घरच्यांनी सीपीआरमधील नातेवाईकांना मदत करा पण तुम्ही स्वतः तिथे जाऊ नका बोलले होते. मात्र, घरच्यांचे न ऐकता त्यांनी स्वतःच्या पॉकेटमनतील पैशातून त्यांनी मदत करायला सुरुवात केली. त्यांची ही धडपड पाहून घरचेही तयार झाले. आता सर्वजण मिळून या रुग्णांसह नातेवाईकांना मोफत नाश्ताची सेवा देत आहेत.

दररोज 100 प्लेट नाश्ताची मदत

सध्या त्या दररोज 100 प्लेट नाश्ता घेऊन येत आहेत. बघता-बघता त्यांनी आणलेला नाश्ता संपत आहे. सीपीआरमध्ये अनेकजण उपाशी असतात तर अनेकजण पैशाच्या अडचणीमुळे काही खाऊ शकत नाही. त्यामुळे समाजातील काही दानशूर व्यक्तींनीही या उपक्रमात सहभाग घेण्याचे या मुलींनी आवाहन केले आहे. दररोज नाश्ता बनवण्याच्या मदतीसाठी त्यांना एका आचाऱ्याचीही गरज आहे. सीपीआर रुग्णालयात इतक्या लोकांना आपल्या मदतीची गरज असल्याचे पाहून शहरातील इतर काही रुग्णालयातही अशा प्रकारे मदत करण्याचा त्यांचा मानस असल्याचे मुलींनी म्हटले आहे.

हेही वाचा - खोदकामात सापडले एक एकर परिसरात पसरलेले तळे; दलदलीत दडलेला ऐतिहासिक ठेवा समोर