कोल्हापूर - वारंवार टाळेबंदीची अफवा व अनेक कारणांमुळे बाजारपेठेत भाजीपाल्याचे दर पडले आहेत. त्याचा अनेक शेतकऱ्यांना फटका बसत आहे. कोल्हापूरमधील शिरोळ तालुक्यातील शेतकऱ्यालाही याचा फटका बसला आहे. आपल्या अर्धा एकर क्षेत्रातील कोबीला केलेला लागवड खर्चही मिळत नसल्याने त्यांनी शेवटी सगळ्या कोबीवर विळा चालवला.
लागवड खर्चही मिळेना
शिरोळ तालुक्यातील नांदणी गावातील बाबासो कुग्गे यांनी आपल्या अर्धा एकर क्षेत्रात कोबी लावला होता. पीकही अतिशय चांगल्या पद्धतीने आले. मात्र, आता कोल्हापूरसह राज्यभरातील बाजारपेठांत कोबीचे दर इतके पडले आहेत त्यामुळे त्यांना त्यातून लागवड खर्चही निघणार नाही, अशी परिस्थिती आहे. त्यामुळे जतन केलेल्या कोबीला काढून टाकावे लागले. यामध्ये त्यांचे मोठ्या प्रमाणात नुकसान झाले आहे.
शिरोळसह राज्यभरात अनेक शेतकऱ्यांची हीच परिस्थिती
कोल्हापूर जिल्ह्यातील शिरोळमध्ये मोठ्या प्रमाणात भाजीपाल्याचे उत्पादन घेतले जाते. शिरोळमधील भाजीपाला राज्यातील मोठ्या बाजारपेठेत जात असतो. मात्र, आता सतत टाळेबंदीच्या अफवा तसेच इतर कारणांमुळे भाजीपाल्याचे दर कोसळले आहेत. शेतकऱ्यांनी पीक घेण्यासाठी केलेला खर्चही त्यातून मिळत नाही. तोडणी आणि वाहतूक खर्च करून बाजरपेठेत घेऊन गेल्यास अजूनच तोटा सहन करावा लागत आहे. त्यामुळे अनेकांना नाईलाजाने उभ्या पिकावर विळा चालवावा लागत आहे.
हेही वाचा - कोल्हापूर : जिल्ह्यात आज 93 नव्या कोरोनाबाधितांची नोंद
