कोल्हापूर - महावितरण कंपनीने कृषी-औद्योगिक, घरगुती, वाणिज्य ग्राहकांच्या विजेच्या दरात मोठ्या प्रमाणात वाढ केली आहे. त्याविरोधात ज्येष्ठ नेते एन. डी. पाटील यांच्या नेतृत्त्वाखाली माजी खासदार राजू शेट्टी, आमदार सतेज पाटील यांच्यासह हजारो शेतकरी रस्त्यावर उतरले आहे. तसेच फसवणूक करणारे महसूल मंत्री चंद्रकांत पाटील यांच्या गाड्या अडवून जाब विचारणार असल्याचा इशारा यावेळी देण्यात आला.
भाजप सरकारने सत्तेवर येण्यापूर्वी वीज दरवाढ कमी करण्याचे आश्वासन दिले होते. मात्र, सत्तेवर आल्यापासून राज्यातील कृषीपंपधारक, घरगुती, औद्योगिक ग्राहकांची बेसुमारपणे आर्थिक लूट या सरकारच्या काळात सुरू असल्याचा आरोप यावेळी करण्यात आला. तसेच वीजनिर्मिती खर्च, प्रशासकीय खर्च आणि वीज गळती यावर कोणतेही नियंत्रण नाही. त्यामुळे एका युनिटमागे १ रुपये ९० पैसे खर्च वाढत आहे. देशात सर्वात जास्त महाग वीजपुरवठा करणाऱ्या राज्यात महाराष्ट्र पहिल्या तीन राज्यामध्ये आहे. यापूर्वी मोर्चा काढून यासंदर्भात सरकारचे डोळे उघडण्याचा प्रयत्न केला होता. यावेळी महसूल मंत्री चंद्रकांत पाटील यांनी वीज दर कमी करण्याचे आश्वासन दिले होते. मात्र, अद्याप त्यांनी हे आश्वासन पाळले नसल्याचे खासदार राजू शेट्टी यांनी सांगितले. त्यासाठी हजारो शेतकऱ्यांनी महावितरण कार्यालयावर विराट मोर्चा काढला. कोल्हापूरच्या दसरा चौकातून सुरू झालेला हा मोर्चा महावितरण कार्यालयावर धडकला. यावेळी शेतकऱयांनी वीज दरवाढ विरोधात जोरदार घोषणाबाजी केली. तसेच या मोर्चादरम्यान मोठा पोलीस बंदोबस्त तैनात केला होता.
२०१४ पूर्वी वाढीव वीज बिलांची होळी करणारे, सत्तेवर असल्यास वीजदर स्थिर ठेवण्याचे आश्वासन देणारे मुख्यमंत्री फडणवीस यांनीही महावितरणच्या लुटीच्या या धंद्याला साथ दिली आहे. याचा परिणाम शेती, उद्योग, व्यवसाय यांच्या विकास आणि उलाढालीवर तसेच सामान्य कुटुंबीयांच्या आर्थिक बजेटवर होत आहे. सरकारच्या चुकीच्या धोरणामुळे शेतकऱ्यांना मनस्ताप सहन करावा लागत असल्याचा आरोप सतेज पाटलांनी केला.
वीजवाढीसंदर्भात शेतकऱ्यांच्या मागण्या -
- राज्यातील सर्व ४१ लाख शेतीपंपधारक वीज ग्राहकांचे वीज बिले तपासून त्यामध्ये दुरुस्ती करण्यात यावी.
- अचूक वीज बिलांच्या आधारे नवीन कृषीसंजीवनी योजना राबवण्यात यावी.
- राज्यातील सर्व शेतकरी वीज ग्राहकांचे सवलतीचे वीजदर पुढील कालावधीसाठी नव्याने निर्धारित करण्यात यावेत.
- अन्यायी घरगुती व औद्योगिक वीजदरवाढ मागे घ्यावी.
- शेतीपंपांची थकीत कनेक्शन तत्काळ द्यावीत.
- ग्राहकांना तत्काळ वीजमीटर उपलब्ध करून द्यावीत.
- ग्रामपंचायतची स्ट्रीट लाईटची कामे २०१८ पासून बंद आहेत. ती त्वरीत सुरू करावीत.
