Nangrat Sahitya Samelan: पहिल्या नांगरट साहित्य संमेलनात बळीराजाच्या समस्यांचे उमटले प्रतिबिंब

स्वाभिमानी शेतकरी संघटना आणि शिवार प्रतिष्ठान यांच्यातर्फे कोल्हापुरातील शिवाजी विद्यापीठाच्या वि. स. खांडेकर सभागृहात पहिले 'नांगरट साहित्य संमेलन' आज (रविवारी) संपन्न झाले. बळीराजांच्या व्यथा या संमेलनात यथोचित उमटल्या. शेतकऱ्यांच्या प्रश्नांवर साहित्यिक, कलावंत, विचारवंत यांच्यामध्ये सखोल विचारमंथन व्हावे आणि शेतकरी चळवळीला दिशा मिळावी, हा यामागील हेतू होता.

कोल्हापूर: या एक दिवसीय साहित्य संमेलनाला उत्सवी स्वरूप न देता शेतकऱ्यांच्या मूळ प्रश्नांवर चर्चा झाली. या माध्यमातून भविष्यकालीन शेतकऱ्यांच्या आंदोलनाची दिशा ठरावी, शेतकऱ्यांचे प्रश्न सुटण्यासाठी ठोस उपाययोजना पुढे यावी तसेच शेतकऱ्यांच्या मूळ प्रश्नांवर साहित्यातून आसूड ओढण्यात यावा हा उद्देश होता. बळीराजाला भेडसावणाऱ्या प्रश्नांना आतापर्यंत साहित्यामध्ये खूपच तोकडे स्थान मिळाले आहे. नांगरट सारख्या साहित्य संमेलनातून नवोदित लेखकांनाही शेतकऱ्यांचे प्रश्न समजावेत, यासाठी हे संमेलन भरविण्यात आले होते.

शेतकऱ्यांच्या प्रश्नांवर चर्चा: शासनकर्त्यांच्या उदासीन धोरणामुळे बळीराजा अडचणीत आला आहे. शेतकऱ्याला यातून बाहेर काढण्यासाठी त्यांचे प्रश्न पोट तिडकीने शासन दरबारी मांडणे गरजेचे आहे. नांगरट साहित्य संमेलनात शेतकऱ्यांना भेडसावणाऱ्या प्रश्नांवर ऊहापोह करण्यात आला. आता दरवर्षी जूनच्या पहिल्या रविवारी नांगरट साहित्य संमेलन होणार असल्याची घोषणा स्वाभिमानी शेतकरी संघटनेचे नेते आणि माजी खासदार राजू शेट्टी यांनी यावेळी केली.