कोल्हापूर - ''आपल्या घरावर करणी झाली आहे. शिवाय घरात सोन्याचा गुप्त खजिना आहे. तो मिळवून देतो'', असे सांगत एका भोंदूबाबाने विवाहितेवर वारंवार बलात्कार केल्याची घटना घडली आहे. कोल्हापुरातल्या गडहिंग्लज तालुक्यामध्ये ही घटना घडली असून भोंदूबाबा बाळू धोंडिबा दळवी याला गडहिंग्लज पोलिसांनी अटक केली आहे. शिवाय त्याला न्यायालयात हजर केले असता १४ डिसेंबरपर्यंत पोलीस कोठडी सुनावण्यात आली आहे. दरम्यान, घडलेल्या प्रकारामुळे गडहिंग्लज तालुक्यात एकच खळबळ उडाली आहे.
आपण बाळूमामाचा अवतार असल्याचे सांगितले -
संशयित आरोपी भोंदूबाबा बाळू धोंडिबा दळवी हा आजरा तालुक्यातील शिरसंगी गावातील रहिवासी आहे. आपण बाळूमामाचा अवतार आहे, असे सांगत त्याने गडहिंग्लज तालुक्यातील नेसरी गावच्या विवाहितेला आपल्या जाळ्यात ओढले. शिवाय तुम्ही मी सांगेल तसे वागा. तुमच्या घरावर करणी झाली आहे. तुमच्या घरात सोन्याचा खजिना आहे, तो सुद्धा मी तुम्हाला मिळवून देतो असेही त्याने सांगितले. मात्र गेल्या सहा वर्षांपासून म्हणजेच २०१४पासून संशयित आरोपी बाळू दळवी याने विवाहितेवर वारंवार बलात्कार केल्याची फिर्याद महिलेने गडहिंग्लज पोलीस ठाण्यात दिली. त्यानुसार या भोंदूबाबावर गुन्हा दाखल झाला असून त्याला कोर्टात हजर करण्यात आले होते. येत्या १४डिसेंबर पर्यंत त्याला पोलीस कोठडी सुनावण्यात आली आहे.
परिसरात संतापाचे वातावरण -
घडलेला प्रकार समजताच परिसरात भोंदूबाबा विरोधात तीव्र संताप व्यक्त केला जात आहे. शिवाय अशा पद्धतीने आणखी काही महिलांना या भोंदूबाबाने फसवले आहे का? याचा सुद्धा पोलीस शोध घेत आहेत. गडहिंग्लज विभागाचे पोलीस उपअधीक्षक गणेश इंगळे हे या घटनेसंबंधी अधिक तपास करत आहेत.
