जालना - जिल्हा परिषद जालन्यात आज(सोमवार) झालेल्या विषय समितीच्या सभापती पदासाठीच्या निवडणुकीत चारही सभापतीपदे महिलांच्या ताब्यात गेली आहेत. त्यामुळे आता अधिकार्‍यांपासून पदाधिकाऱ्यांपर्यंत जिल्हा परिषदेत महिला कारभाऱ्यांची संख्या वाढली आहे.
जालना जिल्हा परिषदेच्या कै. यशवंतराव चव्हाण सभागृहात आज(सोमवार) दुपारी २ वाजता विशेष सभेचे आयोजन करण्यात आले होते. या सभेमध्ये जिल्हा परिषदेच्या चारही सभापती पदासाठी निवडणूक घेण्यात आली. त्यामध्ये समाज कल्याण सभापतीपदी सईदाबी अब्दुल रौफ परसूवाले, महिला व बालकल्याण सभापतीपदी आयोध्या जयप्रकाश चव्हाण यांची निवड करण्यात आली. तर, उर्वरित २ सभापती पदांसाठी ३ अर्ज आले असल्यामुळे निवडणूक घेण्यात आली. यामध्ये भाजपचे जिल्हा परिषद सदस्य अवधूत खडके यांचा पराभव होऊन प्रभा विष्णू गायकवाड आणि पूजा कल्याण सपाटे यांचा विजय झाला. त्यामुळे जिल्हा परिषदेच्या चारही सभापतीपदी आता महिला विराजमान झाल्या आहेत.
हेही वाचा - थकीत मानधन द्या, अन्यथा उपोषण; बालकामगार प्रकल्पातील महिलांनी उपसले हत्यार
जालना जिल्हा परिषदेमध्ये मुख्य कार्यकारी अधिकारी म्हणून निमा अरोरा, उपमुख्य कार्यकारी अधिकारी म्हणून क्षीरसागर, उपमुख्य कार्यकारी अधिकारी म्हणून लोंढे या कार्यरत आहेत. तर, आता लोकप्रतिनिधी म्हणून नियुक्ती झालेल्या चार पदाधिकारी देखील महिलाच आहेत. त्यामुळे जिल्हा परिषदेच्या सर्वसाधारण सभा आणि स्थायी समितीच्या सभेच्यावेळी व्यासपीठावर महिलांची संख्या वाढली आहे. दरम्यान, या निवडणुकीमध्ये निवडणूक निर्णय अधिकारी म्हणून उपविभागीय अधिकारी केशव नेटके यांनी काम पाहिले. त्यांना उपमुख्य कार्यकारी अधिकारी केंद्रे यांनी मदत केली.
हेही वाचा - विविध मागण्यांसाठी ब्राह्मण समाजाचे जालन्यात धरणे आंदोलन
