जालना - चारा छावणीसोबतच जनावरांची काळजी घेणाऱ्या शेतकऱ्यांची काळजी घेतली पाहिजे. ती शिवसेना घेत आहे, असे शिवसेना पक्षप्रमुख उद्धव ठाकरे यांनी म्हटले आहे. ते सध्या जालना जिल्ह्याच्या दौऱ्यावर आहेत. यावेळी दिवंगत शिवसेना प्रमुख बाळासाहेब ठाकरे महाप्रसादाचे वाटप करण्यात आले.
उद्धव ठाकरेंचे जालन्यात आगमन झाले असता कार्यकर्त्यांनी त्यांना बैलगाडीत बसण्यास सांगितले. त्यांच्यासाठी बैलगाडीही सजवण्यात आली होती. परंतु त्यांनी बैलगाडीत बसण्यास नकार दिला. हा नकार का दिला, याचा खुलासा त्यांनी आपल्या भाषणात केला. ते म्हणाले, या दुष्काळी भागातील शेतकऱ्यांचं दु:ख मोठं आहे. त्यांना यातून बाहेर काढणे ही सरकारची जबाबदारी आहे. आणि आम्ही सरकारमध्ये आहोत त्यामुळे हे ओझं आमच्यावरही आहे. माझ्यावर असलेलं हे ओझं मला त्या बैलांच्या डोळ्यात दिसलं. मला हे ओझं त्यांच्यावर टाकायचे नाही. म्हणून मी बैलगाडीत बसणे टाळले.
मी आत्मविश्वासाने मागील वेळेपेक्षा जास्त मते घेणार, असे सांगत होतो. कारण माझा जनतेवर विश्वास होता. आशीर्वाद मिळविण्यासाठी विश्वास कमवावा लागतो. तो आम्ही कमावला आहे. चारा छावणीसोबतच जनावरांची काळजी घेणाऱ्या शेतकऱ्यांची काळजी घेतली पाहिजे. ती शिवसेना घेत आहे. शेतकऱ्यांना मदत म्हणून नाही, तर मी माझे कर्तव्य पार पडत आहे.
शेतकर्‍यांना मिळणार्‍या पीकविम्याची माहिती द्या. शेतकऱ्यांना फसविणाऱ्या विमा कंपन्यांच्याविरोधात जोडे हातात घेऊ. जिल्हाधिकाऱ्यांनी बँकांना सरळ करावे. अन्यथा शिवसेना आपल्या स्टाईलने बँकांना सरळ करेल. पूर्वीच्या सरकारने ७० हजार कोटी खाल्ले. त्यांनी प्रकल्पाची केवळ स्वप्ने दाखवली. मात्र, आम्ही स्वप्नातील प्रकल्प प्रत्यक्षात दाखवणार आहोत. सेना जनतेशी गद्दारी करणार नाही, असे त्यांनी यावेळी म्हटले.
