जालना - भाजप सरकारने व्यापाऱ्यांना जीएसटी आणि नोटबंदीच्या माध्यमातून दिलेल्या जखमांवर लेप लावण्यासाठी जालन्यामध्ये "आमरस पे चर्चा" या कार्यक्रमाचे आयोजन केले. यासाठी मारवाडी, सिंधी आणि गुजराती या तीन समाजातील व्यापाऱ्यांना आणि याच समाजातील ३ राजकीय नेत्यांना बोलावून व्यापाऱ्यांच्या जखमेवर आमरसाचा लेप लावून पुन्हा एकदा मोदींना निवडून आणण्याचा निर्धार करण्यात आला.
या दरम्यान बोलत असताना जालना लोकसभेचे भाजपचे उमेदवार असलेल्या खासदार दानवे यांची पुन्हा एकदा जीभ घसरली आणि आपण केलेल्या विकास कामांचा पाढा वाचताना विरोधकांवर टीका करण्याची ही संधी त्यांनी सोडली नाही. ज्यावेळेस यांना सगळे जमत होते त्यावेळेस हे आमच्यासोबत होते. मात्र, आता विरोधी पक्षात असल्यामुळे या खरकट्या तोंडाच्यांना आम्ही जातीयवादी दिसत आहोत" असे म्हणत दानवेंनी शरद पवार, ममता बॅनर्जी, उमर अब्दुल्ला, फारुख अब्दुल्ला आणि मायावती यांच्यावर निशाणा साधला.
खास व्यापाऱ्यांसाठी आयोजित करण्यात आलेल्या या कार्यक्रमाच्या माध्यमातून जालना लोकसभेचे उमेदवार रावसाहेब दानवे यांचे विचार आणि भूमिका समजावून घेणे तसेच समाजाच्या अपेक्षा त्यांच्यासमोर मांडण्यासाठी या कार्यक्रमाचे आयोजन करण्यात आले होते. सरकारने केलेली नोटबंदी आणि लागू केलेला जीएसटी यामुळे व्यापारी वर्ग नाराज असल्याची उपरती भाजप सरकारला आता अंतिम टप्प्यात लक्षात आली. त्यामुळे व्यापारी वर्गाला या दोन्ही गोष्टी कशा चांगल्या आहेत हे पटवून देण्यासाठी आता व्यापारीच नेते बोलावले आहेत.
व्यापाऱ्यांसाठी "आमरस पे चर्चा" दुष्काळग्रस्तांसाठी काय?
रावसाहेब दानवे यांनी व्यापाऱ्यांची समजुत काढण्यासाठी आमरसाचा लेप लावला. मात्र दुष्काळात होरपळत असलेल्या जालना लोकसभा मतदारसंघातील शेतकऱ्यांसाठी काय केले? असा प्रश्नही या चर्चेच्या निमित्ताने निर्माण झाला आहे. जालना जिल्ह्यात दुष्काळ सदृश्य परिस्थिती असताना आत्तापर्यंत फक्त दोनच चारा छावण्या सुरू झाल्या आहेत. यापेक्षाही भयानक परिस्थिती म्हणजे खाजगी संस्थांच्या गो शाळांमध्ये जनावरांसाठी चारा आणि पिण्याचे पाणी नसल्यामुळे फेब्रुवारीमध्येच बाजिउम्रद येथील गोशाळेतील दोन गाईंचा चाऱ्याअभावी तडफडून मृत्यू झाला. याचा अहवाल ही शासनाने दिला आहे, असे असतानाही चाऱ्याचा प्रश्न सुटला नाही. त्यामुळे शेतकऱ्यांना, बळीराजांला आपल्याकडे वळविण्यापेक्षा व्यापाऱ्यांना आपल्याकडे वळविण्याचा प्रयत्न भाजप करीत आहे. या चर्चेला राज्याचे पाणीपुरवठा मंत्री बबनराव लोणीकर, यांच्यासह शहरातील प्रमुख व्यापारी सुखदेव बजाज, डॉक्टर स्वप्नील मंत्री, प्रवीण मेहता, शांतीलाल काथोड ,विजय जैन ,घनश्यामदास गोयल, जनसंघाचे काबरा यांची उपस्थिती होती.
