जालना - दीडशे वर्षांपूर्वी निजामाने बांधलेल्या इमारतीमध्ये कदीम जालना पोलीस ठाणे सुरू आहे. मात्र, गेल्या वर्षी दोन वेळा या पोलीस ठाण्याचे छत कोसळले. सुदैवाने जीवितहानी झाली नाही. यासंदर्भात ईटीव्ही भारतने वारंवार वृत्त प्रकाशित केले. याची प्रशासनाने गंभीर दखल घेत या वर्षी अपघात होऊ नये म्हणून हे पोलीस ठाणे दुसऱ्या इमारतीत हलविण्याचे निश्चित केले आहे. त्यानुसार पावसाळा सुरू होण्यापूर्वी हे पोलीस ठाणे सर्वे नंबर 488 मधील एका जुन्या भव्य इमारतीमध्ये स्थलांतरित करण्याच्या हालचाली युद्धपातळीवर सुरू आहेत.
ईटीव्ही इम्पॅक्ट : कदीम पोलीस ठाणे सोडणार निजामकालीन इमारतीची साथ जिल्हा क्रीडा संकुलाच्या बाजूला जिल्हा प्रशासनाची एक नवीन इमारत बांधून तयार होती. मात्र, प्रशासकीय अडचणींमुळे गेल्या आठ-दहा वर्षांपासून ही इमारत धूळखात पडली होती. पर्यायाने वापर नसल्यामुळे इमारतीची दुरुस्ती करण्यात आली नाही. मात्र,आता ही इमारत पोलीस प्रशासनाने ताब्यात घेऊन दुरुस्तीचे काम हाती घेतले आहे. कदीम जालना पोलीस ठाण्याचे पोलीस निरीक्षक प्रशांत महाजन यांनी पुढाकार घेऊन या कामाला गती दिली आहे. खरे तर मागील वर्षी कदीम जालना पोलीस ठाण्यात कार्यरत असलेले पोलीस निरीक्षक संजय लोहकरे यांच्या काळातच ही इमारत स्थलांतरित होण्यासाठी प्रयत्न सुरू झाले होते. या इमारतीचे संभाव्य धोके देखील ईटीव्हीने वारंवार शासनाच्या लक्षात आणून दिले होते. पोलीस प्रशासनाने याची दखल घेत दोन मजले असलेली नवीन इमारत कदीम जालना पोलीस ठाण्याला दिली आहे. भव्य परिसर आणि 19 खोल्या पोलिसांच्या ताब्यात येणार आहेत. त्यामुळे आता इथे सुशोभीकरणासह पोलिसांना चांगल्या सोयीसुविधा उपलब्ध करून देण्यासाठी सर्वच कदीम जालना पोलीस ठाण्यातील कर्मचारी कष्ट घेत आहेत.या इमारतीमध्ये पिण्याच्या पाण्यापासून पोलिसांच्या विश्रांती कक्षा पर्यंत सर्व सुविधा उपलब्ध करून दिल्या जातील, अशी माहिती पोलीस निरीक्षक प्रशांत महाजन यांनी दिली.
