जालना - पत्नीला प्रेमसंबंध कळले, त्यामुळे पत्नी सोडून गेली. प्रेयसीचे लग्न झाल्याने राग अनावर झालेल्या प्रियकराने प्रेयसीचा ओढणीने गळा आवळून खून केला. त्यानंतर तिचा मृतदेह रेल्वे रूळावर टाकून तिच्या नातेवाईकांना आत्महत्या करत असल्याचे मेसेज टाकत आत्महत्येचा बनाव केला. या प्रकरणी खून प्रियकर सचिन गायकवाड सध्या पोलिसांच्या ताब्यात असून त्याने गुन्हा कबूल केला आहे.
याबाबत सविस्तर वृत्त असे, चंदनझिरा पोलीस ठाण्याच्या हद्दीतील म्हाडा कॉलनीत राहणाऱ्या सचिन गायकवाडचे त्याच्या शेजारी राहणाऱ्या एका मुलीवर प्रेम होते. पण, सचिनने दुसऱ्या मुलीसह विवाह केला. नंतर सचिनच्या पत्नीला त्याचे प्रेमसंबंध कळले. त्यामुळे ती सचिनला सोडून आपल्या माहेरी गेली. त्यानंतर निराश झालेला सचिन आपल्या प्रेयसीशी संपर्क साधला. तिने शनिवारी (दि. 21 डिसें.) अंबड येथे आईस्कीम खाण्यासाठी बोलवले. त्याच्या विनंतीला मान देत प्रेयसी सचिनला भेटायला गेली. त्यानंतर दोघेही शिंदेवाडी येथे त्यांच्या मित्राच्या घरी गेले.
मित्राच्या घरी कोणीच नव्हते. त्यानंतर सचिनने पत्नी सोडून गेल्याने तिला ब्लॅकमेल करण्याचा प्रयत्न केला. पण, तिने तिच्या कुटुंबीयांना माहिती न देता, परतूर येथील एका युवकाशी नोंदणी पद्धतीने लग्न केले होते. घरगुती कारणांमुळे नवऱ्याच्या संमतीने ती लग्नानंतरही आपल्या माहेरी राहत होती. तिने सचिनला विवाहाचे फोटोही दाखवले. त्यानंतर सचिनचा राग अनावर झाला. रागाच्या भरात त्याने ओढणीने तिचा गळा आवळला. त्यातच तिचा मृत्यू झाला.
अंधाराचा फायदा घेत सचिनने तिचा मृतदेह रेल्वे रूळावर नेऊन टाकले. एवढ्यावरच न थांबता त्याने प्रेयसीच्या मोबाईलवरून नातेवाईकांना आत्महत्या करत असल्याचा संदेश पाठवला. पोलिसांनी तपास सुरू केला आणि प्रेयसीच्या नवऱ्याला ताब्यात घेतले. पण, तो घटनेच्या दिवशी तो जालन्यात नसल्याचे निष्पन्न झाले. त्यानंतर उत्तरीय तपासणीनंतर आत्महत्या नसल्याचे निष्पन्न झाले. त्यानंतर प्रेयसीच्या वडिलांनी पोलिसात खुनाची तक्रार दिली. त्यानंतर पोलिसांनी आपल्या तपासाची दिशा बदलत सचिनला ताब्यात घेतले. त्याला पोलिसी खाक्या दाखवताच त्याने आपल्या गुन्हाची कबुली दिली.
या घटनेची उकल करण्याची कामगिरी उपविभागीय पोलीस अधिकारी सुधीर खिरडकर यांच्या मार्गदर्शनाखाली चंदनजिरा पोलीस ठाण्याचे पोलीस निरीक्षक श्याम सुंदर कोठाळे, पोलीस उपनिरीक्षक प्रमोद बोंडले, सुनील इंगळे, नंदलाल ठाकूर, महिला पोलीस कर्मचारी श्रद्धा गायकवाड आदींनी पार पाडले.
हेही वाचा - जालन्यात अंगणवाडी महिला कर्मचारी उत्कृष्ट पुरस्काराने सन्मानित
