भोकरदन : अवैध वाळू वाहतुकीविरोधात पोलिसांची धडक कारवाई; लाखोंचा मुद्देमाल जप्त

भोकरदन पोलिसांनी पूर्णा नदीपात्रातील अवैध वाळू चोरीविरोधात धडक कारवाई केली.

जालना - भोकरदन पोलिसांनी पूर्णा नदीपात्रातील अवैध वाळू चोरीविरोधात धडक कारवाई केली. यात एक ट्रक, पाच ट्रॅक्टर, एक जेसीबीसह ३५ लाखाचा मुद्येमाल जप्त केला आहे. या कारवाईमुळे अवैध धंदे करणाऱ्यांचे धाबे दणाणले आहेत.

भोकरदनमधील अवैध वाळू वाहतूक करणाऱ्यांविरोधात पोलिसांची धडक कारवाई

हेही वाचा - बनावट कॉल सेंटर प्रकरणी केरळमधून एकाला अटक; गुन्हे शाखेची कारवाई

सविस्तर वृत्त असे की, ९ फेब्रुवारीला सायंकाळी साडेसात वाजेच्या सुमारास पोलीस निरीक्षक दशरथ चौधरी यांना खापरखेडा शिवारात अवैध वाळू उपसा करत असल्याची माहिती मिळाली. त्यावरुन पोलिसांनी तडेगाव शिवारातील पूर्णा नदीपात्रातून अवैध वाळू वाहतूक करणारे ६ ब्रास क्षमतेचे एक हायवा टिप्पर पकडला. चालक योगेश संजय बरडे (वय २२ वर्ष रा. फत्तपूर ता. भोकरदन) व टिप्पर मालक गणेश माधवराव टेपले (रा.चांधई टेपले ता. भोकरदन) व पोलिसांना पाहुन पळून गेलेल्या जेसीबी मालक विशाल दल्लासिँग घुर्सींगे (रा.तडेगाव वाडी ता. भोकरदन) व चालक काकासाहेब साबळे (रा. बरंजळा लोखंडे) यांच्याविरोधात मिलींद सुरडकर यांच्या तक्रारीवरून गुन्हा दाखल करण्यात आला आहे.

तसेच सदर घटनास्थळाजवळ वाळू भरणा करून पळून जाणारे ट्रॅक्टर चालक भरत भगवान सुलाने (रा. नळणी वाडी) व दादाराव विठठल सुलाने (रा.नळणी बाडी) यांच्या ताब्यातील दोन ट्रॅक्टर वाळूसह जप्त करण्यात आले आहेत. तसेच त्यांच्याविरोधात गुन्हा दाखल करण्यात आला आहे.

तसेच मासनपूर शिवारातील केळणा नदीपात्रातून अवैध वाळु बाहतूक करणारे अनिल त्र्यंबक बरडे व मनोहर उत्तमराव पाचरकर यांच्या ताब्यातून वाळूने भरलेले दोन ट्रॅक्टर वाळूसह जप्त करून त्यांच्याविरोधात गुन्हा दाखल करण्यात आला आहे.

दरम्यान, 10 फेब्रुवारीला जवखेडा शिवारातील पूर्णा नदीपात्रातून अवैध वाळू चोरी करणाऱया ट्रॅक्टरसह रविंद्र अशोक ठोंबरे यास मुद्येमालासह ताब्यात घेऊन त्याच्याविरोधात समाधान जगताप यांच्या तक्रारीवरून गुन्हा दाखल केला आहे.

सदरची कारवाई पोलीस अधीक्षक चैतन्य एस, अपर पोलीस अधीक्षक समाधान पवार, उपविभागीय पोलीस अधिकारी सुनिल जायभाये यांच्या मार्गदर्शनाखाली पोलीस निरीक्षक दशरथ चौधरी, मिलींद सुरडकर, पोलीस नाईक रुस्तुम जैवाळ, जगन्नाथ जाधव, समाधान जगताप, गणेश निकम, संजय क्षीरसागर यांनी कारवाई केली आहे.