जालना - अल्पवयीन मुलीचा पाठलाग करून मुलांच्या हस्ते चिट्टी पाठविणे तरुणाला महाग पडले आहे. दोन वर्ष सश्रम कारावास आणि पाचशे रुपये दंडाची शिक्षा न्यायालयाने ठोठावली आहे.
काय आहे प्रकरण -
भोकरदन तालुक्यातील जळगाव सपकाळ या गावचा तरुण सतीश समाधान नेमाने (वय 26 वर्ष) याने 2 एप्रिल 2019 रोजी गावातीलच शाळेत शिकणाऱ्या एका अल्पवयीन मुलीला चिठ्ठी पाठवली होती. ही मुलगी दुपारी एक वाजता शाळेतून घरी आल्यानंतर तिच्या मैत्रिणीसोबत घरी टीव्ही पाहत होती आणि त्याच वेळी सोमीनाथ गणेश धरणवाल याने दारात येऊन या मुलीकडे चिट्टी दिली आणि सांगितले की, सतीश नेमाने यांनी ही चिठ्ठी दिली आहे. सतीशला तू आवडतेस आणि तुला एकांतात भेटावयाचे आहे, असा निरोप दिला असल्याचे त्यांनी सांगितले. हा प्रकार पाहून ही मुलगी खूप घाबरली तसेच यापूर्वी देखील सतीशने तिचा शाळेपासून घरापर्यंत पाठलाग देखील केलेला होता.
मुलगी घाबरल्यामुळे तिच्या मामाने या घाबरण्याचे कारण विचारले असता तिने सर्व हकीकत सांगितली. त्यानंतर मामाने पारध पोलीस ठाण्यामध्ये आरोपी सतीश नेमाने याच्याविरुद्ध बाललैंगिक अत्याचार प्रतिबंधक कायद्यान्वये गुन्हा दाखल केला. या प्रकरणाचा आज निकाल लागला आहे.
न्यायालयाचा निकाल -
आज विशेष जिल्हा व सत्र न्यायाधीश स. गो. देशमुख यांनी निकाल देण्यापूर्वी सरकार पक्षाच्या वतीने एकूण सात साक्षीदार तपासले. त्यामध्ये पीडित मुलगी, तिची प्रत्यक्षदर्शी असणारी मैत्रीण, तिचे मामा, शाळेचे मुख्याध्यापक व पोलीस साक्षीदार तपासण्यात आले. दोन्ही बाजू ऐकून घेतल्यानंतर न्या. स.गो. देशमुख यांनी आरोपी सतीश समाधान नेमाने याला दोन वर्ष सश्रम कारावासाची शिक्षा तसेच पाचशे रुपये दंडाची शिक्षा ठोठावली. सरकारच्या वतीने सहायक सरकारी वकील वर्षा मुकिम यांनी काम पाहिले.
