'मुलगी म्हणून मी सदैव त्यांच्या सोबतच, त्यांचा निर्णय माझ्यासाठी अंतिम'

मुलगी म्हणून मी सदैव त्यांच्यासोबतच असणार आहे. त्यांचा निर्णय माझ्यासाठी अंतिम आहे, अशी प्रतिक्रिया ज्येष्ठ नेते एकनाथ खडसे यांच्या कन्या अ‌ॅड रोहिणी खडसे-खेवलकर यांनी आज 'ईटीव्ही भारत'शी बोलताना दिली.

जळगाव - माजी मंत्री एकनाथ खडसे यांनी बुधवारी भाजपाचा राजीनामा दिला. यावर एकनाथ खडसे यांच्या कन्या अ‌ॅड. रोहिणी खडसे-खेवलकर यांनी आज प्रतिक्रिया दिली. 'ज्या पक्षासाठी नाथाभाऊंनी आपल्या आयुष्याची 40 वर्षे घालवली, त्या पक्षात न्याय मिळत नसल्याने शेवटी नाईलाजाने त्यांनी पक्ष सोडला. त्यांची मुलगी म्हणून मी सदैव त्यांच्या सोबतच असणार आहे. त्यांचा निर्णय माझ्यासाठी अंतिम आहे, असे अ‌ॅड. रोहिणी खडसे-खेवलकर यांनी 'ईटीव्ही भारत'शी बोलताना सांगितले. एकनाथ खडसे यांच्यासोबत उद्या मुंबईत मी देखील राष्ट्रवादीत प्रवेश करणार आहे, असेही यावेळी रोहिणी खडसेंनी स्पष्ट केले.

एकनाथ खडसे यांनी राजीनामा दिल्यानंतर अ‌ॅड. रोहिणी खडसे यांच्या प्रतिक्रियेबाबत उत्सुकता होती. रोहिणी खडसे यांनी गुरुवारी दुपारी खडसेंच्या राजीनाम्याबाबत आपले मत मांडले. एकनाथ खडसे यांनी राजीनामा का दिला आहे, हे त्यांनी कालच माध्यमांशी बोलताना स्पष्ट केले. आता ते राष्ट्रवादीत दाखल होत आहेत. त्यांच्यासोबत मी आणि आई मंदाकिनी खडसे देखील राष्ट्रवादीत प्रवेश करणार आहोत. नाथाभाऊंची मुलगी म्हणून मी सदैव त्यांच्या सोबत असणार आहे. भविष्यातही ते जो काही निर्णय घेतील, तो आम्हाला मान्यच असणार आहे, असे त्या म्हणाल्या.

आता नवा पक्ष, नवी जबाबदारी -

राष्ट्रवादीत प्रवेश करणार असल्याने नवा पक्ष आणि नवी जबाबदारी असेल. अशा परिस्थितीत पक्षश्रेष्ठी जी जबाबदारी देतील. ती चोखपणे पार पाडण्याचा प्रयत्न असेल. त्यात नाथाभाऊ यांच्यासारख्या अनुभवी नेत्याचे पाठबळ असल्याने अधिक चांगले काम करण्याचा प्रयत्न असेल, सर्व काही चांगले होईल, असे खडसे म्हणाल्या.

सर्वजण नाथाभाऊंच्या सोबतच काम करू -

एकनाथ खडसेंनी भाजपाचा राजीनामा दिला. तरी सून खासदार रक्षा खडसे भाजपातच राहणार आहेत, अशा परिस्थितीत खडसे कुटुंबीयांची पुढील भूमिका काय असेल? अशी विचारणा केली असता, त्या म्हणाल्या की, आतापर्यंत आम्ही सर्व जण नाथाभाऊंच्या मार्गदर्शनाखाली काम करत आलो आहोत. कुणी कुठेही असले तरी सर्वजण नाथाभाऊंच्या सोबतच त्यांच्या मार्गदर्शनाखाली काम करू.