जळगाव : कोरोनाच्या पार्श्वभूमीवर खबरदारी म्हणून मार्च महिन्यात सर्वत्र लॉकडाऊन करण्यात आला. यावेळी नाशिक येथून नातेवाईकांच्या घरून मुळगावी जाण्यासाठी वाहन नसल्यामुळे चोरट्याने थेट दुचाकी चोरुन प्रवास केला. या घटनेनंतर हिंमत वाढल्याने त्या चोरट्याने त्याच्या दोन साथीदारांच्या मदतीने तीन महिन्यात दोन दुचाकी चोरल्या. दरम्यान, या तिन्ही चोरट्यांना स्थानिक गुन्हे शाखेच्या पथकाने गुरुवारी अटक केली आहे. त्यातील एक चोरटा अल्पवयीन आहे. रवींद्र शिवदास पाटील (वय २४, रा. टेहू, ता. पारोळा), गोपाल अरुण महाजन (वय २३, रा. शिव कॉलनी, पारोळा) व एक अल्पवयीन मुलगा अशी अटक केलेल्या तिघांची नावे आहेत. त्यांच्याकडून तीन दुचाकी हस्तगत करण्यात आल्या आहेत.
रवींद्र पाटील हा या गटाचा म्होरक्या आहे. तो पारोळ्यात एका चारचाकी दुरुस्तीच्या गॅरेजवर काम करतो. मार्च महिन्यात तो नाशिक येथे नातेवाईकांकडे गेला होता. यावेळी २३ मार्चपासून लॉकडाऊन सुरू झाले. त्यामुळे रवींद्रला पारोळ्यात येण्यासाठी वाहन मिळत नव्हते. त्याने थेट अंबड पोलीस ठाण्याच्या हद्दीतून एक दुचाकी चोरी केली. याच दुचाकीने तो पारोळ्याला आला. दरम्यान, पारोळ्यात आल्यानंतर त्याने गोपाल महाजन व अल्पवयीन मुलगा या दोन्ही मित्रांना दुचाकी चोरीची स्टोरी सांगितली. तेव्हापासून तिन्ही मित्रांनी मिळून दुचाकी चोरी सुरू केली असून गेल्या तीन महिन्यात त्यांनी आणखी दोन दुचाकी चोरल्या आहेत.
दरम्यान, यातील रवींद्र पाटील हा संशयितपणे फिरत असल्याची माहिती मिळाल्यानंतर स्थानिक गुन्हे शाखेचे पोलीस निरीक्षक बापू रोहोम, नारायण पाटील, अशोक महाजन, जितेंद्र पाटील, रामचंद्र बोरसे, शरद भालेराव, रामकृष्ण पाटील, मनोज दुसाने, महेश महाजन, मुरलीधर बारी, विजय पाटील, दिनेश बडगुजर, नरेंद्र वारुळे यांच्या पथकाने रवींद्र पाटील याला ताब्यात घेतले. पोलिसी खाक्या दाखवताच त्याने गुन्ह्याची कबुली दिली. तसेच दोन्ही साथीदारांची नावेही सांगितली. या तिघांना एरंडोल येथील दुचाकी चोरीच्या गुन्ह्यात अटक करुन एरंडोल पोलीस ठाण्याच्या ताब्यात देण्यात आले आहे.
महामार्गालगत शौचास बसलेल्या तरुणाची दुचाकी डोळ्यादेखत लांबवली -
हे तिघे चोरटे जून महिन्यात एरंडोल येथे आले होते. रात्रीच्या वेळी परत पारोळा येथे जात असताना त्यांनी महामार्गावरुन एक दुचाकी चोरी केली. या दुचाकीचा मालक महामार्गालगत दुचाकी उभी करुन शेतात शौचास गेला होता. निर्जनस्थळी उभी दुचाकी पाहून तिघांनी या दुचाकीचा स्वीच सुरू केला. शौचास बसलेल्या मालकाच्या डोळ्यादेखत त्यांनी ही दुचाकी लांबवली. ही दुचाकी देखील पोलिसांनी हस्तगत केली आहे.
