काँग्रेसच्या ठाम भूमिकेमुळे सर्वपक्षीय पॅनलचा फज्जा; जिल्हा बँक निवडणूक बिनविरोध होण्याची शक्यता मावळली

जळगाव जिल्हा मध्यवर्ती सहकारी बँकेची निवडणूक बिनविरोध होण्याची शक्यता मावळली आहे. सर्वपक्षीय पॅनल गठीत करण्यासंदर्भात शनिवारी दुपारी पार पडलेल्या सर्वपक्षीय नेत्यांच्या बैठकीत निवडणूक बिनविरोध करण्यासंदर्भातील चर्चा फिस्कटली.

जळगाव - जिल्हा मध्यवर्ती सहकारी बँकेची निवडणूक बिनविरोध होण्याची शक्यता मावळली आहे. सर्वपक्षीय पॅनल गठीत करण्यासंदर्भात शनिवारी दुपारी पार पडलेल्या सर्वपक्षीय नेत्यांच्या बैठकीत दोन तास काथ्याकूट करूनही चर्चा फिस्कटली. जिल्हा बँकेच्या निवडणुकीत कोणत्याही परिस्थितीत भाजपसोबत जाण्यास काँग्रेसने स्पष्ट शब्दांत नकार दिल्याने शिवसेना, भाजप आणि राष्ट्रवादी काँग्रेसची अडचण झाली. ही निवडणूक भाजपला दूर ठेऊन महाविकास आघाडीच्या झेंड्याखाली लढवावी, अशी भूमिका आज काँग्रेसने मांडली. त्यामुळे उद्या (रविवारी) पुन्हा चर्चेची फेरी होण्याची शक्यता आहे.

जळगाव जिल्हा बँकेच्या निवडणुकीसाठी आज दुपारी अजिंठा शासकीय विश्रामगृहात पालकमंत्री गुलाबराव पाटील, भाजप नेते गिरीश महाजन, राष्ट्रवादी काँग्रेसचे माजीमंत्री गुलाबराव देवकर, डॉ. सतीश पाटील, आमदार शिरीष चौधरी, किशोर पाटील, सुरेश भोळे, माजी आमदार प्रा. चंद्रकांत पाटील, काँग्रेसचे जिल्हाध्यक्ष प्रदीप पवार, डी. जी. पाटील आदींची उपस्थिती होती. सुमारे दोन तास ही बैठक बंदद्वार चालली. पण त्यात सर्वपक्षीय पॅनल गठीत करण्याबाबत कोणत्याही प्रकारचा निर्णय होऊ शकला नाही.

उद्या पुन्हा बैठक होणार?

या बैठकीत काँग्रेसच्या नेत्यांनी भाजपसोबत जाण्यास स्पष्ट शब्दांत नकार दिला. महाविकास आघाडी म्हणून काँग्रेस, राष्ट्रवादी काँग्रेस आणि शिवसेनेने ही निवडणूक भाजपला बाजूला ठेऊन लढवावी, अशी भूमिका त्यांनी मांडली. त्यामुळे बैठकीत सर्वपक्षीय पॅनलबाबत ठोस निर्णय झाला नाही. शेवटपर्यंत काँग्रेसचे नेते आपल्या भूमिकेवर ठाम असल्याने बैठक आटोपती घेण्यात आली. दरम्यान, बैठकीनंतर पालकमंत्री गुलाबराव पाटील व भाजप नेते गिरीश महाजन यांनी माध्यमांना टाळण्याचा प्रयत्न केला. आजच्या बैठकीत अंतिम निर्णय झाला नाही. पण जागा वाटपाची चर्चा सुरू आहे. उद्या पुन्हा बैठक होणार असून, त्यात निर्णय होऊ शकतो, असेही त्यांनी सांगितले. त्यामुळे उद्या काँग्रेस वगळता भाजप, शिवसेना आणि राष्ट्रवादी काँग्रेसची बैठक होण्याची शक्यता वर्तवली जात आहे.

..तर काँग्रेस ताकदीनिशी स्वबळावर लढणार; काँग्रेसचे नेते ठाम-

बैठकीनंतर काँग्रेसचे जिल्हाध्यक्ष प्रदीप पवार म्हणाले की, जिल्हा बँकेची निवडणूक भाजपसोबत काँग्रेस कदापि लढणार नाही, ही आमची भूमिका ही धुतल्या तांदळाइतकी स्वच्छ आहे. जर ही निवडणूक महाविकास आघाडी म्हणून लढणार असतील तर मात्र आम्ही सोबत लढू. पण महाविकास आघाडी लढणार नसेल तर मात्र काँग्रेस आपल्या ताकदीनिशी सर्व जागा लढेल, असेही प्रदीप पवार यांनी स्पष्ट केले. उद्या जर महाविकास आघाडीची बैठक होईल आणि आम्हाला बैठकीचे आमंत्रण मिळाले तर आम्ही उपस्थित राहू, अन्यथा आम्हाला पर्याय खुले आहेत, असेही ते म्हणाले.

हे ही वाचा - भाजप नेते गिरीश महाजनांना करायचंय चित्रपटात काम, निर्मात्याला म्हणाले, एक संधी द्या!

काँग्रेसला बाजूला ठेऊन इतर तिन्ही पक्ष एकत्र येणार?

दरम्यान, काँग्रेसने आपली भूमिका ठामपणे जाहीर केल्याने आता भाजप, शिवसेना आणि राष्ट्रवादी काँग्रेसची अडचण झाली आहे. त्यामुळे काँग्रेसला दूर ठेवून तीनही पक्ष एकत्र येण्याची देखील शक्यता वर्तवली जात आहे. त्याबाबतचे सूतोवाच पालकमंत्री गुलाबराव पाटील आणि गिरीश महाजन यांनी दिले आहेत. उद्या या संदर्भात बैठक होण्याची शक्यता आहे. जर अशी बैठक झाली, तर त्या बैठकीला काँग्रेसचे नेते हजेरी लावणार नसल्याचेही काँग्रेसच्या वतीने स्पष्ट करण्यात आले आहे.