जळगाव - कोरोनाच्या पार्श्वभूमीवर राज्यात सर्वत्र लॉकडाऊन आहे. या काळात काही ठिकाणी नियमांचे उल्लंघन होत आहे. जळगाव जिल्ह्यात नियमांचे उल्लंघन करणाऱ्यांवर जिल्हा पोलीस दलातर्फे कारवाई करण्यात येत आहे. लॉकडाऊन सुरू झाल्यापासून आतापर्यंत विविध बाबींचे उल्लंघन करणाऱ्यांवर एकूण 3 हजार 242 गुन्हे दाखल झाल्याची माहिती, पोलीस अधीक्षक डॉ. पंजाबराव उगले यांनी दिली.
कोरोनाने संपूर्ण जगात थैमान घातले आहे. कोरोनाचा वाढता प्रादुर्भाव रोखण्यासाठी 3 मेपर्यंत देशभर लॉकडाऊन घोषीत केलेला आहे. राज्यात लॉकडाऊनची प्रभावी अंमलबजावणी करण्याचे निर्देश मुख्यमंत्र्यांनी दिले आहेत. त्यानुसार जिल्हा पोलीस दलाच्या वतीने लॉकडाऊनची प्रभावी अंमलबजावणी होण्यासाठी विविध उपाययोजना राबवण्यात येत आहेत. लॉकडाऊनच्या कालावधीत काही निर्बंध घालून दिलेले आहेत. तरीसुद्धा काही नागरिक बेजबाबदारपणे वागत असून, स्वत:बरोबरच दुसऱ्यांच्याही जीवाला धोका निर्माण करत असल्याचे दिसून येत आहे. त्यामुळे कायद्याचे उल्लंघन करणाऱ्यांविरोधात जळगाव जिल्हा पोलिसांनी कारवाईची धडक मोहीम हाती घेतली आहे. लॉकडाऊन सुरू झाल्यापासून आतापर्यंत जिल्ह्यात विविध कारणांनी भारतीय दंड विधान संहिता कलम 188, 269, 270 आणि 290 तसेच साथरोग प्रतिबंधक कायदा 2 ते 4 सह आपत्ती व्यवस्थापन कलम 54 (4) आदिंचे उल्लंघन करणाऱ्यांवर कारवाई करण्यात आली आहे. आतापर्यंत 3 हजार 242 गुन्हे दाखल झाले आहेत.
कलम 188चे उल्लंघन केल्याप्रकरणी -
मास्क न लावणे - 343, विना परवाना दुकान उघडणे - 142, सोशल डिस्टन्सिंग न पाळणे - 57, दुसऱ्या जिल्ह्यातून अनधिकृतपणे प्रवेश करणे - 59, सोशल मीडियावरून अफवा पसरवणे - 19, दुचाकी वाहन डबलसीट चालवणे - 22, त्याचबरोबर दुचाकी वाहन जप्त - 493, ऑटोरिक्षा जप्त - 105, फोर व्हीलर वाहन जप्त - 26 याप्रमाणे कारवाई करण्यात आली आहे. कलम 188 चा भंग केल्याबद्दल इतर केसेस - 1 हजार 11, दारुबंदी अंतर्गत केसेस - 575 अशा प्रकारे एकूण 3 हजार 242 गुन्हे दाखल करण्यात आले आहेत.
नागरिकांना सहकार्य करण्याचे आवाहन-
लॉकडाऊनच्या प्रभावी अंमलबजावणीसाठी विविध उपाययोजना पोलीस दलातर्फे राबविण्यात येत आहे. नागरिकांनीही लॉकडाऊनच्या नियमांचे पालन करुन घरातच रहावे, आवश्यकता भासल्यास स्वत:ची सुरक्षीतता पाळूनच घराबाहेर पडावे. पोलीस व प्रशासनाने केलेल्या सूचना पाळून कोरोना विषाणूचा प्रादुर्भाव रोखण्यासाठी सहकार्य करावे, असे आवाहन पोलीस अधीक्षक डॉ. उगले यांनी नागरिकांना केले आहे.
