जळगाव - जिल्ह्यात सातत्याने सुरू असलेल्या परतीच्या पावसामुळे खरीप हंगामातील ज्वारी, बाजरी, मका, सोयाबीन आणि कापूस पिकाची दयनीय अवस्था झाली आहे. पावसात भिजलेल्या कापसासह धान्याला जागेवरच कोंब फुटले आहेत. हातातोंडाशी आलेला घास हिरावला गेल्यामुळे शेतकऱ्यांवर ऐन दिवाळीत संकट कोसळले आहे.
जिल्ह्यात ऑगस्ट महिन्यापासून एकही नक्षत्र रिकामे गेले नसून सतत पाऊस पडत आहे. आतापर्यंत वार्षिक सरासरीच्या सुमारे 140 टक्के पाऊस पडला आहे. सततच्या पावसामुळे आधी पूर्वहंगामी उन्हाळी कपाशीचे नुकसान झाले. दसरा झाल्यानंतर घरात कापूस आल्याने दिवाळी साजरी करणाऱ्या शेतकऱ्यांचे यावर्षी अक्षरश: दिवाळे निघाले आहे. पावसामुळे जमिनीलगतच्या कैऱ्या तसेच बोंड कुजल्यानंतर वरचा बहार तरी आपल्या हाती येईल, अशी आशा शेतकरी बाळगून होते. प्रत्यक्षात पाऊस थांबला नसल्याने वरील फांद्याना लागलेल्या कापसाच्या बोंडांमधील सरकीलाही आता कोंब फुटले आहेत. बियाणे, खते, फवारणी तसेच मशागतीसाठी अतोनात खर्च करून सुद्धा घरात एकही बोंड न आल्याने कापूस उत्पादकांना डोक्याला हात लावावा लागला आहे.
हेही वाचा - मी म्हातारा झालो असेल तर घरी नातू-पणतू सांभाळेन, एकनाथ खडसेंची प्रतिक्रिया
अशाच प्रकारे उडीद, मूग ही पिके शेतात सडल्यानंतर सोयाबीन, ज्वारी, बाजरी आणि मका ही पिके तरी आपल्याला तारतील, असे शेतकऱ्यांना वाटले होते. मात्र, पावसाने शेतकऱ्यांच्या उरल्या सुरल्या आशेवरही पाणी फेरले आहे. तसे पाहिले तर परिपक्व झालेल्या सर्व पिकांची पंधरा दिवसांपूर्वीच काढणी करायला पाहिजे होती. मात्र, पाऊस सुरू असल्याने शेतकऱ्यांचा नाईलाज झाला असून डोळ्यादेखत मोठ्या कष्टाने उभ्या केलेल्या हंगामाची राखरांगोळी होताना पाहण्याची दुर्दैवी वेळ त्यांच्यावर आली आहे.
हेही वाचा - बाहेरून येणाऱ्यांना न्याय मिळतो, मग मी तर रक्ताचा - एकनाथ खडसे
काही शेतकऱ्यांनी दसरा झाल्यानंतर पावसाची उघडीप मिळताच ज्वारी तसेच सोयाबीची कापणी करण्याची घाई केली होती. मात्र, त्यांना कापलेले पीक उचलण्याची सवडही पावसाने दिली नाही. जमिनीवर पडलेले धान्य जागेवरच उगवत आहे. शासनाने ओल्या दुष्काळाची स्थिती लक्षात घेता नुकसानीचे पंचनामे करण्यात वेळ घालविण्यापेक्षा नुकसानग्रस्तांना सरसकट मदत देण्याची व्यवस्था करावी, अशी मागणी शेतकऱ्यांनी केली आहे.
